Бухорода 29 ноябрь, жума куни уч кишининг ўлимига олиб келган Nexia ва автобус иштирокидаги ЙТҲга нима сабаб бўлгани аниқланди.
ИИВ ЙҲХББ матбуот хизматининг «Дарё»га маълум қилишича, воқеа тахминан соат 07:15 ларда содир бўлган. Андижон шаҳрида яшаган 22 ёшли ҳайдовчи Х.С. Nexia-2 машинасини «Тошкент—Хоразм» А-380 йўлининг 305 километрида ҳайдаб кетаётганида рулда ухлаб қолиши оқибатида, қаршисидан Бухоро шаҳрида яшовчи 33 ёшли ҳайдовчи Х.М. бошқариб кетаётган Higer русумли автобус йўлига чиқиб, тўқнашган.
Мавзуга доир: Бухорода Nexia автобусга урилиши оқибатида 3 киши ҳалок бўлди. Машинанинг ўзи темир-терсакка айланди
Мазкур ҳолат юзасидан Бухоро вилояти ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми «а» банди (Одамлар ўлимига олиб келган, транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
ИИВ Йўл ҳаракати хавфсизлиги бош бошқармаси ҳайдовчилардан кучли толиқиш ҳолатида транспорт воситаларини бошқармасликни сўраган ҳолда бундай ҳолатда ҳаракатланиш ҳайдовчи ва йўл ҳаракатининг бошқа иштирокчилари хавфсизлигига таҳдид солиши ҳақида огоҳлантирмоқда.
Изоҳ (0)