26 ноябрь куни Литва пойтахти Вильнюс шаҳри кўчаларида 50 дан ортиқ трактор колоннаси юришни амалга оширди. Бу Литва фермерлар иттифоқининг ҳукумат олиб бораётган сиёсатдаги қишлоқ хўжалиги соҳасига берилган муносабатга жавоб бўлди. Мамлакатнинг бошқа вилоятларидаги марказий шаҳарларидаги кўчалар ҳам фермерларнинг «оғир артиллерияси»га тўлиб кетган. Бу ҳақда «ТАСС» хабар қилди.
«Бугунги норозилик — огоҳлантириш намойиши. Ушбу ҳаракат орқали ҳукумат аъзоларига, уларнинг ўз қарорлари билан қишлоқларни ўлдираётганини тушунтирмоқчимиз», — дейди журналистлар билан суҳбатда донли экинлар етиштириш маданияти ассоциацияси раҳбари Игнас Янкаускас.
Норозилик намойишида уч мингтагача қишлоқ хўжалиги техникаси иштирок этган. Турли маркадаги тракторлар, айрим ҳайдовчилар ҳатто сомон ортилган тиркамани улаган ҳолда кўчада ҳаракатланган. Вильнюсда колоннани полиция кузатиб борган ва ушбу намойиш транспорт қатновига халақит қилмаган. Барча жойларда ўтказилган акциялар ҳукумат билан олдиндан келишув асосида ташкиллаштирилган.
«Ўзимиз кутган муносабатни олмасак, норозилик билдиришда давом этамиз», — дейди Янкаускас. У фермерларнинг автомобиль йўлларини ёпиб қўйиши мумкинлигини ҳам инкор қилмади.
Фермерлар 2020 йилги давлат бюджети лойиҳасида қишлоқ хўжалигида кўп ишлатиладиган дизел ёнилғиси учун акциз солиғини камайтиришни талаб қилмоқда. Ушбу акциз янги йилда 7,2 фоизга чиқиши мумкин.
«Охирги уч йилда қишлоқ хўжалиги соҳасидаги солиқлар беш бараварга кўпайган», – дея таъкидлаган Литва фермерлар иттифоқи вакили.
Қишлоқ хўжалиги вакиллари ҳукуматдан Брюсселда Литва фермерларига ҳам Европа иттифоқидаги бошқа давлатлардаги каби иттифоқ фондидан пуллар ажратилишини сўрамоқда. 2004 йилда Евроиттифоққа аъзо бўлгандан кейин литвалик фермерлар дотация олишни бошлаган, бироқ ушбу маблағ бошқа аъзо давлатларга берилаётгандан анча кам. Етти йил давом этган ўтиш давридан кейин ушбу ҳолатнинг мувазанатлашуви кутилганди, лекин фермерларнинг ушбу нияти амалга ошмади. Еврокомиссиянинг бюджет таклифларига кўра 2027 йилда ушбу тўловлар ўртача кўрсаткичнинг тахминан 80 фоизига кўтарилади.
Изоҳ (0)