Ливанда бош вазир вазифасини бажараётган «Ал-Мустақбал» ижтимоий-сиёсий ҳаракати етакчиси Саад Ҳаририй коалицион вазирлар маҳкамасини бошқаришни бутунлай рад этди. Бу ҳақда «ТАСС» хабар берди.
«Ушбу қарорга келишимга инқироздан технократлар ҳукумати ташкил қилмасдан туриб чиқиб бўлмаслигини кўриб турганим туфайли келдим», — дейди Ҳаририй.
Шунингдек, у республика президенти Мишель Аунга парламент маслаҳатлашувини ўтказиш ва янги бош вазир тайинлашни тавсия этган.
«Ёки мен, ёки ҳеч ким ақидасига боғланиб қолмаган. Ливанликлар охирги 30 йил ичида ҳукумат таркибида бўлган барчани жавобгарликка тортмоқчи. Мен ўша рўйхатдаги кишилардан бириман», — дея таъкидлаган Ҳаририй.
2009—2011 йиллар ва 2016—2018 йилларда коалицион ҳукуматни бошқарган «Ал-Мустақбал» етакчиси 29 октябрда Ливанда давом этаётган норозилик намойишлари оқибатида истеъфога чиққан.
Ливанда халқнинг норозилик намойишлари 17 октябрда бошланган, бош вазир Саад Ҳаририй истеъфога чиққач, унинг ўрнини мамлакат собиқ молия вазири эгаллаши мумкинлиги хабар қилинган. Бироқ Муҳаммад Сафадий мамлакат бош вазири бўлиш учун ўз номзодини қўймасликка қарор қилган ва истеъфо берган ҳукуматнинг собиқ раҳбари Саад Ҳаририй ўз лавозимига қайтишига умид қилишини билдирганди.
Изоҳ (0)