БМТ, Иордания, Ливан ва Ироқ Нур-Султонда Суриядаги вазият музокараларида кузатувчи сифатида иштирок этади

Қозоғистон пойтахти Нур-Султон шаҳрида ўтадиган Суриядаги вазият муҳокамасига бағишланган музокараларга иштирокчилар томонидан БМТ, Иордания, Ливан ва Ироқ вакиллари кузатувчи сифатида таклиф қилинди. Бу ҳақда Қозоғистон Ташқи ишлар вазирлиги ахборот хизмати вакили Айбек Смадияров 25 ноябрь, душанба куни ўтказилган брифингда маълум қилган, деб ёзмоқда «ТАСС».

«10 —11 декабрь кунлари Нур-Султон шаҳрида Суриядаги вазиятнинг Остона форматидаги муҳокамасига бағишланган навбатдаги, 14-халқаро олий даражадаги учрашуви ўтказилади. Унда кафил давлатлар Эрон, Россия ва Туркия делегациялари, Сурия ҳукумати ва мамлакатдаги қуролли мухолифат аъзолари иштирок этади. Кузатувчилар сифатида БМТ, Иордания, Ливан ва Ироқнинг юқори даражадаги вакиллари ҳам таклиф қилинган», — дейди Смадияров.

Унинг сўзларига кўра, Нур-Султонда ўтадиган учрашувда Суриядаги вазиятнинг сиёсий муҳокамалари ва Женевада давлат конституцияси қўмитасининг иши масалалари ҳақида фикр алмашилади.

«Суриядаги, Фрот дарёси атрофлари ва Идлиб вилоятидаги вазият, ўзаро ишонч, гаровдагиларни озод қилиш, бедарак йўқолганларни излаш, мамлакат ҳудудида сарсон юрганлар, хориждаги суриялик қочоқларга гуманитар ёрдам кўрсатиш, жумладан, халқаро конференцияларни ўтказиш, Конституция қўмитаси ишини ташкил қилишда сиёсий жараёнларни бошлаш учрашув кун тартибидаги асосий масалалар бўлади», — дейди Қозоғистон ТИВ вакили.

Аввал Қозоғистоннинг Суриядаги нотинч вазият муҳокамасига бағишланган учрашувнинг Нур-Султон шаҳрида октябрь ойида қабул қилишга тайёрлиги, кейинчалик музокараларнинг ноябрга кўчгани хабар қилинган, сўнгра тадбирнинг декабрда ўтказилиши маълум бўлган.