Qozog‘iston poytaxti Nur-Sulton shahrida o‘tadigan Suriyadagi vaziyat muhokamasiga bag‘ishlangan muzokaralarga ishtirokchilar tomonidan BMT, Iordaniya, Livan va Iroq vakillari kuzatuvchi sifatida taklif qilindi. Bu haqda Qozog‘iston Tashqi ishlar vazirligi axborot xizmati vakili Aybek Smadiyarov 25-noyabr, dushanba kuni o‘tkazilgan brifingda ma’lum qilgan, deb yozmoqda “TASS”.
“10 —11-dekabr kunlari Nur-Sulton shahrida Suriyadagi vaziyatning Ostona formatidagi muhokamasiga bag‘ishlangan navbatdagi, 14-xalqaro oliy darajadagi uchrashuvi o‘tkaziladi. Unda kafil davlatlar Eron, Rossiya va Turkiya delegatsiyalari, Suriya hukumati va mamlakatdagi qurolli muxolifat a’zolari ishtirok etadi. Kuzatuvchilar sifatida BMT, Iordaniya, Livan va Iroqning yuqori darajadagi vakillari ham taklif qilingan”, — deydi Smadiyarov.
Uning so‘zlariga ko‘ra, Nur-Sultonda o‘tadigan uchrashuvda Suriyadagi vaziyatning siyosiy muhokamalari va Jenevada davlat konstitutsiyasi qo‘mitasining ishi masalalari haqida fikr almashiladi.
Mavzuga doir: Eron prezidenti Suriyadagi vaziyatni hal etish uchun Ostona formatidagi uchrashuvlar o‘tkazilishi zarurligini qayd etdi
Avval Qozog‘istonning Suriyadagi notinch vaziyat muhokamasiga bag‘ishlangan uchrashuvning Nur-Sulton shahrida oktabr oyida qabul qilishga tayyorligi, keyinchalik muzokaralarning noyabrga ko‘chgani xabar qilingan, so‘ngra tadbirning dekabrda o‘tkazilishi ma’lum bo‘lgan.
Izoh (0)