АҚШ республикачилар партияси сенатори Линдси Грем Оқ уйнинг илтимосига кўра Сенатда арманлар оммавий қирғини ҳақидаги резолюцияни овозга қўйишни бекор қилди, дея хабар берган «Интерфакс».
«Оқ уйда Туркия президенти билан учрашув ўтказилганидан кейин биз Сенатда йиғилиш ўтказиб бу масалани муҳокама қилдик», — дейди Грем.
Гремнинг сўзларига кўра, қонунчилик масалалари бўйича Оқ уй вакили сенатор Боб Менендеснинг арманлар оммавий қирғини борасидаги резолюцияни овозга қўймоқчи эканини айтиб, ундан ушбу жараённи тўхтатишни сўраган.
«Бу ишни қилганимнинг ягона сабаби Эрдўғоннинг шаҳар ҳудудида бўлгани билан боғлиқ. Унинг ташрифи вақтида резолюциянинг овозга қўйилиши нотўғри ҳаракат бўларди. Мен АҚШ ҳамда Туркия ўртасидаги муносабатларни имкон даражасида қутқариб қолишга уриняпман», — деган сенатор Линдси Грем.
Сенатор Менендеснинг резолюциясини блоклаган сиёсатчи келаси сафар бу каби қарорларга эътироз билдирмаслигини маълум қилди.
Ўтган ҳафтада Менендес ва сенатор Тед Круз арманлар оммавий қирғини ҳақидаги резолюцияни яна муҳокамага қўйган. Бу сафар ҳужжат бошқа бир сенатор Девид Пердю томонидан рад қилинган.
«Сенатор Пердю резолюциянинг қабул қилиниши анчайин нозик муаммоларни юзага келтириши мумкинлигидан хавотирда. У Туркия ва минтақадаги бошқа иттифоқдошлар билан муносабатларни чигаллаштиради», — дея вазиятга изоҳ берган Пердюнинг вакили.
Мавзуга доир: Эрдўғон: Бундан бир аср аввалги ҳодисалар ҳақида сиёсатчилар эмас, тарихчилар гапириши керак
Резолюция учун конгресменларнинг 405 нафари овоз берган, 11 нафар сиёсатчи ушбу қарорга қарши чиққан. Ҳужжат демократлар вакили Адам Шифф томонидан вакиллар палатаси муҳокамасига қўйилганди.
Изоҳ (0)