Innovatsion rivojlanish vazirligi tomonidan o‘tkazilgan startap loyihalar tanlovi g‘oliblari — Agrowin va N.E.F. startap-korxonalari vakillari USAID dasturining Markaziy Osiyoda raqobatbardoshlik, savdo va ish o‘rinlarini yaratish loyihasi taklifiga binoan Qozog‘istonning Chimkent shahrida o‘tkazilgan Markaziy Osiyo savdo forumida ishtirok etdi. Bu haqda “Daryo”ga vazirlik matbuot xizmati ma’lum qildi.
Forum mintaqaviy savdoni rag‘batlantirishga bag‘ishlangan eng yirik yillik tadbirlardan biri hisoblanadi. Bu galgi mavzu “Meva-sabzavot sohasidagi innovatsiyalar va investitsion yondashuvlar“ bo‘lib, unda Markaziy va Janubiy Osiyo, Yevropa va AQSh davlat sektori vakillari, soha mutaxassislari ishtirok etdi.
Mazkur forum doirasida N.E.F. startap-korxonasi Qozog‘iston meva-sabzavotchilik ilmiy-tadqiqot institutining “Sariag‘ash“ mintaqaviy filiali bilan qo‘shma korxona tashkil etish bo‘yicha shartnoma imzoladi. N.E.F. (New ecological feed — “Yangi ekologik oziqa”) qoramol, qo‘y, quyon, parranda, baliq uchun yem mahsulotlari tayyorlashning yangi texnologiyasini ishlab chiqarishga joriy etgan. Mazkur startap jamoasi vitaminlarga boy omixta oziqalar, parranda, chorva yoki boshqa hayvon turlarining ehtiyojlaridan kelib chiqqan holda yem mahsulotlari va qo‘shimchalar tayyorlash, qishki mavsumda chorva uchun barra o‘t yetishtirish bilan shug‘ullanadi.
Hamkorlikning maqsadi tashkilotlarning texnik salohiyatini birlashtirish, tajriba almashish va ikki tomonlama o‘zaro manfaatli aloqalarni rivojlantirishdir. Shartnoma, shuningdek, vitamin mahsulotlari, omixta yem va ularning maxsus tarkibiy qo‘shimchalarini ishlab chiqarishni ko‘zda tutadi.
Agrowin startap loyihasi 2019-yilda tashkil etilgan bo‘lib, in vitro usulida mevali, manzarali, xona ko‘chatlari va payvand taglarini ko‘paytirish bilan shug‘ullanadi. Loyiha mualliflarining qayd etishicha, ular Qozog‘iston, Qirg‘iziston kompaniyalari bilan biznes aloqalarini yo‘lga qo‘yib, xalqaro tadbirda ishtirok etishning ilk tajribasiga ega bo‘ldi.
Izoh (0)