Европа Тикланиш ва Тараққиёт Банки (ЕТТБ) «Korzinka.uz» супермаркетлар тармоғи акциядорлик капиталига 40 миллион доллар миқдорида тўғридан-тўғри хорижий инвестиция киритади. Бу ҳақда тармоқ томонидан хабар берилди.
Сармоя тармоқнинг айни пайтдаги мавжуд 50 та супермаркети сонини 2025 йилга келиб 140 тага етказиш, шунингдек, амалиёт самарадорлиги ва корпоратив бошқарув стандартларини халқаро стандартлар даражасига кўтаришга йўналтирилади.
«Korzinka.uz» томонидан маълум қилинишича, мазкур маблағлар Ўзбекистонда замонавий чакана савдо соҳасини тараққий эттиришга катта туртки беради. Киритиладиган инвестиция тармоқни кенгайтириш, амалиёт ҳамда молия кўрсаткичларини яхшилаш билан бирга, лойиҳа атроф-муҳитга ижобий таъсир кўрсатиш, ижтимоий кўрсаткичларни яхшилаш, компанияда саломатлик ва меҳнат муҳофазаси йўналишларида қабул қилинган ички тартиб ва амалиётларни барқарорлаштиришга хизмат қилади.
Қайд этилишича, «Korzinka.uz» супермаркетлар тармоғи барча зарурий жараёнлар, шу жумладан, молиявий ҳисоботнинг халқаро стандартлари аудити, экологик ва ижтимоий экспертизадан ўтган. Мазкур экспертиза ЕТТБ ва миллий қонунчиликнинг юқори стандартларига кўра компаниянинг атроф-муҳит, соғлиқни сақлаш, хавфсизликка таъсири бошқарув тизимининг талабларига мувофиқлигини тасдиқлади.
Таъкидланишича, банк билан ҳамкорлик нафақат сармоялар, балки ЕТТБ таъсисчиларининг махсус жамғармаси томонидан молиялаштириладиган бир қатор муҳим техник кооперация лойиҳалари билан бирга юритилади.
Ўтказилган экспертизалар натижасида «Молиявий ҳисобот ва бошқарувни такомиллаштириш дастури», «Таъминот занжирида рискларни баҳолаш», «Корпоратив бошқарув бўйича ҳаракатлар режаси» ва бошқа кўплаб муҳим ҳужжатлар ишлаб чиқилган.
Маълумот учун, «Korzinka.uz» супермаркетлар тармоғи 1996 йилда таъсис этилган бўлиб, Англесей Фоод компанияси таркибига киради. Бугунги кунда Ўзбекистоннинг 9 та ҳудудидаги 50 та «Korzinka.uz» ва Korzinka.uz DISKONT супермаркетлари тармоқ таркибига киради. Тармоқнинг ривожланиши натижасида 2016 йилдан буён 33 та янги супермаркет очилган.
Изоҳ (0)