2019 йилнинг 10 ойи давомида Ўзбекистондаги тижорат банклари томонидан 41 минг нафар жисмоний шахсга 5,9 триллион сўм миқдорида ипотека кредитлари ажратилган. Бу ҳақда Марказий банк матбуот хизмати маълум қилди.
Бу кўрсаткич ўтган йилнинг шу даврига (3,7 триллион сўм) нисбатан 37 фоизга кўп.
Ажратилган ипотека кредитларининг энг юқори ўсиш кўрсаткичлари (1 178 миллиард сўм) Тошкент шаҳри, шунингдек, Қорақалпоғистон Республикаси, Тошкент, Сурхондарё ва Самарқанд вилоятлари ҳиссасига тўғри келмоқда. Ажратилган кредитларнинг камайиш тенденцияси эса Фарғона, Жиззах, Сирдарё, Навоий ва Хоразм вилоятларида кузатилди.
Ажратилган ипотека кредитларининг 99,0 фоизи (5 848 миллиард сўм) бирламчи бозорга, 1,0 фоизи (61,0 миллиард сўм) иккиламчи бозорга йўналтирилган.
Ипотека кредитлар таркибида имтиёзли асосда йиллик 7—16 фоизларда ажратилган кредитлар улуши 82 фоизни, 17—20 фоизларда 14,1 фоизни, 20 дан юқори фоизларда ажратилган кредитлар улуши эса 3,9 фоизни ташкил қилади.
Изоҳ (0)