Шавкат Мирзиёев 22 ноябрь куни уй-жой қурилиши масаласида видеоселектор йиғилиши ўтказди. Унда Президент давлат идоралари раҳбарларига халқ ва ОАВ билан мулоқотда кибрга берилмаслик ҳақида топшириқ берди. «Раҳбарлар нафақат ўзининг, балки давлатнинг ҳам шаънини сақлашга масъул экани таъкидланди», — дейилади расмий ахборотда. Ёзда бўлган кўнгилсизликлар хотираси ҳали қайноқ.
Ўзбекистон ички ишлар вазири ўринбосари Муҳиддин Жўраев ва Қоровул қўшинлари қўмондони Дмитрий Пан лавозимидан озод этилди. Хабар беришларича, Жўраевни лавозимидан озод қилиш ҳақидаги ҳужжат Президент томонидан 18 ноябрда имзоланган. Шунингдек, Паннинг ҳибсга олингани ҳақида хабарлар тарқалган эди, бироқ Бош прокуратура бу ҳолат бўйича расмий маълумот йўқлигини билдирди.
Баҳодир Ҳодиев «Нархоз» ректорлигидан олинганидан бери, у ердан қизиқ хабарлар келяпти. Университетда 25 ноябрдан ўқиш ҳафтаси беш кунлик этиб белгиланган. Бундан ташқари, форма бекор қилинган. Жамоатчилик форма масаласини бир бошқача кутиб олди — бир томон ўқишга энди футболка ва калта пайпоқларда ҳам бориш мумкинлигидан хурсанд бўлса, бошқа тараф: «Форма бекор қилинди дегани, қизлар рўмол билан ҳам ўқишга бориши мумкин, дегани ҳам-да, а?», деб савол қўйган.
Ўзбекистонда ҳукумат ёшларнинг бўш вақти умуман қолмаслиги учун тинмай ҳаракат қиляпти. Хусусан, куни кеча «Қорақалпоғистон Республикаси, вилоятлар ва Тошкент шаҳрида ёшларни маданият ва санъат муассасаларига кенг жалб этиш орқали уларнинг бўш вақтларини мазмунли ташкил қилиш тизимини янада ривожлантириш тўғрисида»ги қарор қабул қилинган. Унга кўра, халқ артисти, халқ рассоми каби фахрий унвонлари бор санъаткорлар энди ҳокимларга маданият ва санъат бўйича ижодий маслаҳатчи сифатида бириктирилади.
22 ноябрь куни Ўзбекистоннинг аксарият ҳудудларида, хусусан, Тошкент шаҳрида қор ёғди. «Ўзгидромет»нинг хабар беришича, қор 23 ноябрда ҳам ёғади. Қўшимча қилишларича, декабрда иқлим ўртача нам ва ҳарорат бўйича меъёрларга яқин бўлади. Ой давомида ҳарорат кечаси 2—7 даража илиқдан 0—5 даража совуққача, кундузи 10—15 даража илиқдан 0—5 даража илиққача ўзгариб туради.
Ўзбекистонда яна нима янгиликлар? Тошкентда 29 ноябрь куни Марказий Осиё давлат раҳбарларининг иккинчи маслаҳат учрашуви бўлиб ўтади, 2020 йил февралида эса Президент Шавкат Мирзиёев Россияга сафар қилиши кутилмоқда. АҚШ Ўзбекистон халқ таълими тизимини ислоҳ қилишга ёрдам беради. Ҳукумат 88 мингдан ортиқ ишсиз аёлнинг бандлигини таъминлаш бўйича қарор қабул қилди. Қашқадарёда ҳайдовчи машинаси билан эвакуаторга ортилди. Наманганда саккиз марта судланган аёл яна ўғирлик содир этди. Жаҳонгир Ортиқхўжаев ЎзЛиДеПдан халқ депутатлари Тошкент шаҳар кенгаши депутатлигига номзод қилиб кўрсатилди. Ёшлар Иттифоқи раиси Алишер Саъдуллаев «Биз билгандик, биз кутгандик» деган сўзлари мемга айланган қизнинг навбатдаги чиқишига муносабат билдирди. Афсонавий боксчи Рой Жонс ва машҳур ММА юлдузи Тошкентга келди. Ҳабиб Нурмагомедов Ўзбекистонда жанг ўтказиш-ўтказмаслиги ҳақидаги саволга жавоб берди.
Жаҳонда нима гап? Telegram фаолиятида носозликлар кузатилди — мессенжер маълум вақт ишламай қолди. Боливия Ташқи ишлар вазирлиги мамлакат собиқ президенти Эво Моралеснинг ҳаракатлари сабаб Мексикага эътироз билдирди. Покистон ТАПИ қувури қурилиши бошланишидан аввал туркман газининг нархи туширилишини талаб қилмоқда. Олмаота аэропортида тажриба ўтказилди — йўловчиларга бегона юкни олиб ўтиш таклиф қилинди. Олимлар ер юзида қазиб олинган барча олтинни ҳисоблаб чиқди.
Ўқиш тавсия этилади: «Онамга қасд қилиб, ҳаётимни барбод қилдим». Адашган қиз ҳикояси.
Изоҳ (0)