Shavkat Mirziyoyev 22-noyabr kuni uy-joy qurilishi masalasida videoselektor yig‘ilishi o‘tkazdi. Unda Prezident davlat idoralari rahbarlariga xalq va OAV bilan muloqotda kibrga berilmaslik haqida topshiriq berdi. “Rahbarlar nafaqat o‘zining, balki davlatning ham sha’nini saqlashga mas’ul ekani ta’kidlandi”, — deyiladi rasmiy axborotda. Yozda bo‘lgan ko‘ngilsizliklar xotirasi hali qaynoq.
O‘zbekiston ichki ishlar vaziri o‘rinbosari Muhiddin Jo‘rayev va Qorovul qo‘shinlari qo‘mondoni Dmitriy Pan lavozimidan ozod etildi. Xabar berishlaricha, Jo‘rayevni lavozimidan ozod qilish haqidagi hujjat Prezident tomonidan 18 noyabrda imzolangan. Shuningdek, Panning hibsga olingani haqida xabarlar tarqalgan edi, biroq Bosh prokuratura bu holat bo‘yicha rasmiy ma’lumot yo‘qligini bildirdi.
Bahodir Hodiyev “Narxoz” rektorligidan olinganidan beri, u yerdan qiziq xabarlar kelyapti. Universitetda 25-noyabrdan o‘qish haftasi besh kunlik etib belgilangan. Bundan tashqari, forma bekor qilingan. Jamoatchilik forma masalasini bir boshqacha kutib oldi — bir tomon o‘qishga endi futbolka va kalta paypoqlarda ham borish mumkinligidan xursand bo‘lsa, boshqa taraf: “Forma bekor qilindi degani, qizlar ro‘mol bilan ham o‘qishga borishi mumkin, degani ham-da, a?”, deb savol qo‘ygan.
O‘zbekistonda hukumat yoshlarning bo‘sh vaqti umuman qolmasligi uchun tinmay harakat qilyapti. Xususan, kuni kecha “Qoraqalpog‘iston Respublikasi, viloyatlar va Toshkent shahrida yoshlarni madaniyat va san’at muassasalariga keng jalb etish orqali ularning bo‘sh vaqtlarini mazmunli tashkil qilish tizimini yanada rivojlantirish to‘g‘risida”gi qaror qabul qilingan. Unga ko‘ra, xalq artisti, xalq rassomi kabi faxriy unvonlari bor san’atkorlar endi hokimlarga madaniyat va san’at bo‘yicha ijodiy maslahatchi sifatida biriktiriladi.
22-noyabr kuni O‘zbekistonning aksariyat hududlarida, xususan, Toshkent shahrida qor yog‘di. “O‘zgidromet”ning xabar berishicha, qor 23-noyabrda ham yog‘adi. Qo‘shimcha qilishlaricha, dekabrda iqlim o‘rtacha nam va harorat bo‘yicha me’yorlarga yaqin bo‘ladi. Oy davomida harorat kechasi 2—7 daraja iliqdan 0—5 daraja sovuqqacha, kunduzi 10—15 daraja iliqdan 0—5 daraja iliqqacha o‘zgarib turadi.
O‘zbekistonda yana nima yangiliklar? Toshkentda 29-noyabr kuni Markaziy Osiyo davlat rahbarlarining ikkinchi maslahat uchrashuvi bo‘lib o‘tadi, 2020-yil fevralida esa Prezident Shavkat Mirziyoyev Rossiyaga safar qilishi kutilmoqda. AQSh O‘zbekiston xalq ta’limi tizimini isloh qilishga yordam beradi. Hukumat 88 mingdan ortiq ishsiz ayolning bandligini ta’minlash bo‘yicha qaror qabul qildi. Qashqadaryoda haydovchi mashinasi bilan evakuatorga ortildi. Namanganda sakkiz marta sudlangan ayol yana o‘g‘irlik sodir etdi. Jahongir Ortiqxo‘jayev O‘zLiDePdan xalq deputatlari Toshkent shahar kengashi deputatligiga nomzod qilib ko‘rsatildi. Yoshlar Ittifoqi raisi Alisher Sa’dullayev “Biz bilgandik, biz kutgandik” degan so‘zlari memga aylangan qizning navbatdagi chiqishiga munosabat bildirdi. Afsonaviy bokschi Roy Jons va mashhur MMA yulduzi Toshkentga keldi. Habib Nurmagomedov O‘zbekistonda jang o‘tkazish-o‘tkazmasligi haqidagi savolga javob berdi.
Jahonda nima gap? Telegram faoliyatida nosozliklar kuzatildi — messenjer ma’lum vaqt ishlamay qoldi. Boliviya Tashqi ishlar vazirligi mamlakat sobiq prezidenti Evo Moralesning harakatlari sabab Meksikaga e’tiroz bildirdi. Pokiston TAPI quvuri qurilishi boshlanishidan avval turkman gazining narxi tushirilishini talab qilmoqda. Olmaota aeroportida tajriba o‘tkazildi — yo‘lovchilarga begona yukni olib o‘tish taklif qilindi. Olimlar yer yuzida qazib olingan barcha oltinni hisoblab chiqdi.
O‘qish tavsiya etiladi: “Onamga qasd qilib, hayotimni barbod qildim”. Adashgan qiz hikoyasi.
Izoh (0)