Ижтимоий тармоқларда Тошкент шаҳар Бектемир туманидаги 293-сонли умумтаълим мактаби ошхонасига нотаниш аёл киргани ва ўқувчиларга чой ичишни таклиф қилгани ҳақида хабарлар тарқалди. Тошкент шаҳар Халқ таълими бошқармаси мазкур ҳолат бўйича маълумот берди.
Хабар берилишича, жорий йилнинг 16 ноябрь куни соат тахминан 15:30 да мактабга жиянини олиб кетиш учун келганини айтган номаълум аёл мактаб навбатчисидан кун совуқ бўлгани учун мактаб ошхонасидан иссиқ чой олиб ичишга рухсат сўраган. Ошхонага кирган аёл у ерда ўтирган 5 ва 6-синф ўқувчиларига ошхонадан олган ўзи ичиб ўтирган чойдан ичишни таклиф этган.
Шу вақт оралиғида дарсга қўнғироқ чалинган ва болалар дарсга бироз кеч қолган. Ҳолатга аниқлик киритиш учун синф раҳбари Н.Ансарова ошхонага тушган ва ўқувчилар атрофида бўлган нотаниш аёл ҳақида мактаб раҳбари Н.Тожибоевани огоҳлантирган. Мактаб раҳбари Н.Тожибоева шу заҳоти ошхонага тушиб, нотаниш аёл билан савол-жавоб ўтказиб, берилган саволларга аниқ жавоб бера олмаган фуқаро бўйича дарҳол туман ИИБ ходимларига хабар қилган.
Мактабга келган туман ИИБ ходимлари фуқарони тезкорлик билан суҳбатга тортиб, унга тегишли бўлган сумка ва кийимларини текширган. Текширув натижасида, аёлнинг қўлидаги сумкада укол олиш учун олинган шприц борлиги аниқланган. Аёл шприцни ўқувчиларга кўрсатмаган ва ўқувчиларнинг соғлиғига зарар етказадиган ҳеч қандай хатти-ҳаракат қилмагани маълум бўлган.
Шунингдек, туман ИИБ ходимлари томонидан суриштирув олиб борилганда ушбу фуқаро 1996 йилда туғилган Каунбаева Маҳлиё Азимжон қизи бўлиб чиққан. У Тошкент вилояти Олмалиқ шаҳар ИИБда бедарак йўқолганлар рўйхатида эканлиги ва руҳий хасталиги борлиги маълум бўлган.
ИИБ томонидан аёлнинг яшаш жойи аниқланиб, у онаси Муҳаббат Мирамитова ва Олмалиқ шаҳар ИИБ ходимларига топширилган.
Фуқаронинг онаси фарзандининг соғлиғида муаммо борлигини, лекин ҳеч кимга зарари тегмаслигини тасдиқлаб, мактабга адашиб келиб қолганлигини маълум қилган.
Изоҳ (0)