Тошкент шаҳридаги бир нечта кўчада ўрнатилган реклама баннерларида гиёҳванд моддалар сотиладиган сайтга олиб кирувчи QR-кодлар тасвирлангани аниқланди. Буни дастлаб журналист Муҳаммадшариф Маматқулов Тошкентдаги Оҳангарон шоссесида ўрнатилган баннерда пайқаб қолган ва бу ҳақда ҳуқуқни муҳофаза қилувчи идораларга хабар берган.
«Gazeta.uz»нинг ёзишича, QR-код ҳақиқатдан ҳам «.ру» доменидаги синтетик гиёҳванд моддалар сотиладиган сайтга олиб киради.
Instagram’даги саҳифасида обуначилари сони айни пайтда 783 мингдан ортиқ бўлган ўзбекистонлик блогер қиз мазкур баннерларда реклама қилинаётган конкурс ҳақида аввалроқ ўз саҳифасида хабар қилган. Блогер Шаҳзода Салимжонованинг айтишича, у дастлаб бу гиёҳванд моддалар рекламаси эканлигини билмаган. Айни пайтда конкурс ташкилотчисининг саҳифаси ўчириб қўйилган.
Мавзуга доир: Ўзбекистонлик блогер қиз ўзи билмаган ҳолда гиёҳванд моддани реклама қилгани маълум бўлди
Бундай реклама баннерлари нафақат Тошкентда, балки Қозоғистон, Қирғизистон ва Тожикистондаги шаҳарларда ҳам аниқланган. Хусусан, баннер ва билбордлар Олмаота, Чимкент, Қарағанда, Уст-Каменогорск, Самарқанд, Душанбе, Бишкек ва Ўш шаҳарларида ҳам мавжудлиги қайд этилган.
Маълум бўлишича, гиёҳванд моддалар рекламаси тўғрисидаги хабар 20 октябрда тарқалган. Ҳозирда рекламани қўйган сайт ёпилган ҳамда тергов ҳаракатлари олиб борилмоқда. Қозоғистон ва Қирғизистондаги баннерлар олиб ташланган.
Қирғизистон ИИВ Гиёҳванд моддаларнинг ноқонуний айланишига қарши кураш хизмати ушбу реклама баннерининг ўрнатилиши юзасидан текширув бошлаган.
Изоҳ (0)