Қозоғистоннинг Чимкент вилоятида қурилаётган бинонинг том тўсиқлари ва темир-бетон деворлари қулаб тушди. Оқибатда олти нафар Ўзбекистон фуқароси жароҳат олди. Бу ҳақда Қозоғистон ИИВ Фавқулодда вазиятлар қўмитасига таяниб, «Informбюро» хабар берди.
Ҳодиса 21 ноябрь, пайшанба куни маҳаллий вақт билан соат 15:30 да Қоратов туманининг Сайрам массивида юз берган. Том ва девор қулаши оқибатида олти нафар ўзбекистонлик ишчи жароҳат олган. Улар шаҳар касалхонасига жойлаштирилган. Икки нафар ишчи жонлантириш бўлимига ётқизилган.
Ҳодиса жойига одамларни излаш учун кинология бўлинмаси жалб қилинган. Вайроналар остида қурбонлар ва жабрланганлар қолмаган.
Қоратов тумани ҳокими Абзал Алиқулов ҳодиса қурувчилик меъёрлари бузилгани сабабли юз берганини маълум қилган.
Қайд этилишича, қурилиш лойиҳасиз ва рухсатсиз бошланган. Ҳолат юзасидан жиноят иши қўзғатилган, тергов ҳаракатлари олиб борилмоқда.
Изоҳ (0)