Тошкент метроси учун олиб келинган Россиянинг «Метровагонмаш» компанияси томонидан ишлаб чиқарилган янги поездлар 21 ноябрь, пайшанба куни ишга тушди. Поездлар «Ўзбекистон» йўналишида бир неча қатновни амалга оширган. «Дарё» фотомухбири ушбу метропоезд суратларини тўплаб, тақдим этди.
Ҳар бир поезд состави тўртта вагондан ташкил топган: иккита асосий моторли ва бири моторли ва бири моторсиз иккита оралиқ вагон. Йўловчилар бутун состав бўйлаб бемалол ҳаракатланиши учун вагонлар ўртасида ўтиш жойи мавжуд.
Яхши шовқин изоляцияси ва замонавий технологиялар қўллангани ҳисобига поездлар ҳаракати жуда текис ва шовқинсиз бўлади.
Эшиклар устидаги ёруғлик диодли панеллар ҳаракат йўналишини кўрсатади ва бекатлар номини акс эттиради.
Бундан ташқари вагонларда метрополитен картаси жойлаштирилган сенсорли экран мавжуд бўлиб, зарурат туғилганда йўловчилар метрополитен схемасини ўрганиши, керакли бекатни топиши, ҳаракат йўналишини тузиши, йўлга кетадиган вақтни ҳисоблаши ва бошқа фойдали маълумотларга эга бўлиши мумкин.
Поездларда ҳароратни назорат қилиш тизими ўрнатилган ва деразалардаги махсус шиша пакетлар салонда оптимал ҳароратни сақлашга имкон беради. Вагонларда видеокузатув ва ёнғин сигнализацияси датчиклари мавжуд.
Поездларнинг беш хил ёритиш ранглари ер остидаги ва устидаги ҳаракатга боғлиқ равишда автоматик тарзда совуқ оқ рангдан иссиқ сариқ ранггача созланади.
Шунингдек, эрталаб йўловчиларни тетиклаштириш учун совуқ, бироқ ёрқин рангли ёритиш режимини ёқиш режалаштирилмоқда. Кечқурунга яқин эса ёритиш режими секинлик билан тинчлантирувчи иссиқ сариқ рангга ўтади.
Изоҳ (0)