Ёшлар иттифоқининг қашқадарёлик ходими қалбаки пул ишлаб чиқариш билан шуғуллангани маълум бўлди. Бу ҳақда «Дарё»га Қашқадарё вилояти ИИБ матбуот хизмати раҳбари Ирода Расулова хабар берди.
Ирода Расулованинг маълум қилишича, қалбаки пул ишлаб чиқариш ҳолати вилоят ИИБнинг Жиноят қидирув бўлими, Коррупция ва иқтисодий жиноятларга қарши курашиш бўлими ҳамда Касби туман ИИБ Жиноят қидирув бўлимининг тезкор вакиллари томонидан олиб борилган тадбирда маълум бўлган.
Касби туманининг Қўриқ қишлоғида яшовчи Ёшлар иттифоқининг 24 ёшли ходими А.Б. «Муғлон» МФЙ ҳудудидаги ўзи ижрага олган тикувчилик цехида турли хил купюрадаги қалбаки пулларни ишлаб чиқарган.
Айтилишича, А.Б.дан олинган 172 дона 50 минг сўмлик купюрадаги 8 миллион 600 минг сўм пул, рангли принтердан тўлиқ чиқарилмаган 84 дона 50 минг сўмлик купюрадаги пуллар, Epson русумли рангли принтер ва Lenovo русумли ноутбук тегишли тартибда ҳужжатлаштириб олинган.
А.Б.дан олинган АB 0304117 серия рақамли 172 дона 50 минг сўмлик купюра «Давлат белгилиси» корхонасида ишлаб чиқарилмаганлиги, рангли пуркагичли принтер ёрдамида тайёрлангани аниқланган.
Касби туман ҳокимлиги матбуот хизматининг аниқлик киритишича, Б.А. тумандаги 36-мактабда Ёшлар иттифоқи етакчиси бўлиб ишлаган.
Мазкур ҳолат юзасидан Касби туман ИИБ томонидан 19 ноябрь куни А.Б.га нисбатан жиноят иши қўзғатилиб, тергов ҳаракатлари олиб борилмоқда.
Изоҳ (0)