Ўзбекистон Халқ демократик партияси раиси Улуғбек Иноятов беш кишидан иборат оилани боқиш учун бир ойда 2,5 миллион сўм етиши ҳақидаги фикрини ўзгартирмади. Бу ҳақда партия раҳбари «Севимли» телеканалининг «Замон» ахборот дастурига берган интервьюсида маълум қилган.
«Мен истеъмол саватчасининг фақат озиқ-овқат қисми учун жавоб бердим. Бугунги кунда 500 минг сўмга битта одамни бир ой давомида бемалол озиқлантириши мумкин», — деди ХДП раҳбари интервьюда.
Эслатиб ўтамиз, Ўзбекистон Халқ демократик партияси раиси 10 ноябрь куни Тошкентда сиёсий партиялар вакиллари иштирокида ўтказилган 4 раундли «Демократик дебат»да истеъмол саватчаси ҳақидаги саволга жавоб берган эди. Ўшанда у Тошкентда 2,5 миллион сўм ойлик олувчи бир нафар боқувчи 5 кишидан иборат оилани боқиши мумкин, деган фикрни билдирган эди. Бу баёнот турли баҳсларни юзага келтирди. Шундан сўнг, партия Марказий Кенгаши сектор мудири Равшан Хомитов бу фикрга изоҳ бериб, партия раҳбари оиланинг барча харажатларини эмас, балки фақат озиқ-овқат маҳсулотларини харид қилишни назарда тутганини айтиб ўтди.
Изоҳ (0)