Ўзбекистоннинг Россиядаги элчихонаси консуллик бўлими Москва шаҳридаги Л.А.Ворохобов номли 67-сон шаҳар клиник касалхонасининг реанимация бўлимида августдан буён комада ётган Россия Халқлар дўстлиги университети талабаси, Ўзбекистон фуқароси Ўлмасхон Баҳронов вафот этгани тўғрисида ОАВда тарқалган хабарни тасдиқлади. Бу ҳақда ТИВ матбуот хизмати хабар берди.
«Элчихона Ўзбекистон Бандлик ва меҳнат муносабатлари вазирлиги Ташқи меҳнат миграцияси масалалари агентлигининг Москва шаҳридаги ваколатхонаси билан биргаликда марҳумнинг яқинларига консуллик-ҳуқуқий ва ташкилий масалаларни ҳал қилишда ёрдам берди ва 14 ноябрь куни ҳамюртимизнинг жасади ватанга юборилди», — дейилади хабарда.
Мазкур вазият элчихонанинг доимий назоратида бўлган, Россия Соғлиқни сақлаш вазирлиги кўмагида юқори малакали мутахассислар жалб қилинган, Бош прокуратурага текширув ўтказишни сўраб расмий сўров юборилган. Айни пайтда Россия ҳуқуқни муҳофаза қилувчи органлари томонидан шифокорларнинг хатти-ҳаракатига ҳуқуқий баҳо бериш мақсадида текширув ўтказилмоқда.
Аввалроқ Ўлмасхоннинг вафот этгани ҳақида унинг амакиси Фарруҳхон Шукруллаев Facebook орқали маълум қилганди. Ўлмасхон нотўғри белгиланган дори воситаси сабабли комага тушгани ҳақида хабар берилганди. Йигит онасининг таъкидлашича, шифокор Ўлмасхонни гиёҳванд модда қабул қилишда гумон қилиб, унга галоперидол буюрган. Восита киритилгандан кейин Ўлмасхоннинг юраги тўхтаб қолган.
Изоҳ (0)