«Туркистон ислом ҳаракати» халқаро террористик ташкилотига аъзо бўлиб, Покистон ҳудудидаги жанговор ҳаракатларда иштирок этган Ўзбекистон фуқароси 9 йилга озодликдан маҳрум этилди, деб хабар беради ЎзА.
Ботир Мадаминов 1986 йил Андижон вилоятининг Асака туманида туғилган.
У 2008—2010 йилларда отаси ва икки нафар укаси билан Россияга ишлаш учун бир неча маротаба бориб келади. Кейинроқ бир ўзи Москва вилоятининг Серпухова туманига ишлаш учун боради.
У 2011 йилнинг декабрь ойига қадар фарғоналик Абдураҳим ва андижонлик Умид исмли шахслар билан биргаликда қурилиш ишларида ишлайди. Аммо бу икки кимса «Жиҳодчилар» диний экстремистик ташкилотининг «Москва жамоати» аъзолари бўлганлиги боис улар аста-секин Ботирни «ҳижрат», «жиҳод» қилишга даъват этади. Натижада Ботир уларга эргашиб, «Жиҳодчилар» оқимининг «Москва жамоати» аъзосига айланади.
2011 йил декабрь ойида эса у Покистоннинг Мир-Али шаҳрига бориб, «Туркистон ислом ҳаракати» халқаро террорчилик ташкилотига қўшилади.
Дастлаб у жангарилар тайёрлаш лагерида қурол-яроғ ҳамда портловчи қурилмалар билан ишлаш усулларини ўрганади. Сўнгра 2012—2013 йиллар давомида «Носир» тахаллуси остида Покистон ҳукумати қўшинларига қарши жанговар ҳаракатларда иштирок этади.
2013 йилнинг куз фаслида «Туркистон ислом ҳаракати» ташкилоти Покистон қуролли кучларининг жиддий қаршилигига учрагач, 2014 йилнинг ноябрь ойида улар Афғонистонга ўтади.
2015 йилнинг охирида Ботир Мадаминов «Ислом давлати Хуросон вилояти» террористик гуруҳи сафига қўшилиб, 2016-2018 йилларда гуруҳ аъзоларига озиқ-овқат маҳсулотларини тарқатиш билан шуғулланади
2019 йилнинг 3 апрель куни Ботир Мадаминов Ўзбекистонга қайтарилди.
Ботир Мадаминовнинг содир этган қилмишлари атрофлича кўриб чиқилди ва у 9 йил муддатга озодликдан маҳрум этилди.
Изоҳ (0)