Бугун, 15 ноябрь куни, Марказий сайлов комиссияси Олий Мажлис Қонунчилик палатаси депутатлигига партиялардан кўрсатилган номзодларни расман рўйхатга олди. Бу ҳақда Қонунчилик палатаси сайловларини ёритиш бўйича Халқаро матбуот маркази хабар берди.
Номзодлар қўйилган сайлов округлари сони 750 тани ташкил этади. Қонунчилик палатаси депутатлигига янгидан номзод этиб қўйилганлар сонида 440 нафарини эркак (58,7 фоиз) ва 310 нафари аёлдир (41,3 фоиз). Депутатликка қайтадан номзод этиб қўйилганлар сони - 37 нафари эркак (4,9 фоиз), 6 нафари аёл (0,8 фоиз).
Шунингдек, депутатликка номзодларнинг энг кўпи педагог мутахассислигига эга - 223 нафар. Иқтисодчи 143 нафар, шифокор 93 нафарга тенг. Кейинги ўринлардан муҳандис (65), ҳуқуқшунос (52), агроном (30), журналист (24), тадбиркор (18), файласуф (8), сиёсатшунос (3) ва бошқалар (91) жой олди.
Бундан ташқари, номзодларнинг 687 нафари ўзбек, 25 нафари қорақалпоқ, 13 нафари тожик, 7 нафари рус, 6 нафари қозоқ, 4 нафари корейс, 3 нафари қирғиз, 2 нафари татар ва 3 нафари бошқа миллат вакилларидир.
Номзодлар орасида 22 нафар фан доктори бор. Фан номзодига эга бўлган номзодлар сони 52 нафарга тенг, олий маълумотлилар сони - 750 нафар.
Қонунчилик палатаси депутатлигига номзодларнинг 341 нафари (45,5 фоиз) 41-50 ёшдагилар бўлса, 227 нафари (30,3 фоиз) - 31-40 ёшдагилар, 156 нафари (20,8 фоиз) 51-60 ёшдагилар, 14 нафари (1,9 фоиз) 25-30 ёшдагилар ҳамда 12 нафари (1,6 фоиз) 60 ёшдан катталардир.
Изоҳ (0)