Ўзбекистонда кўзи ожизлар учун норматив-ҳуқуқий китоблар чоп этилади

Ўзбекистон Республикаси Адлия вазирлиги «Адолат» ҳуқуқий ахборот марказида «Очиқ адлия» дастури доирасида «Очиқ эшиклар куни» бўлиб ўтди. Бу ҳақда ЎзА хабар берди.

Тадбирда марказ фаолияти ва вазифалари, Ўзбекистон Республикаси Қонун ҳужжатлари маълумотлари миллий базаси Lex.uz’даги ўзгариш, янгилик ва қулайликлар, «Адолат» нашр белгиси билан чоп этилаётган норматив-ҳуқуқий ҳужжатлар ҳақида маълумотлар берилди.

«Адолат» ҳуқуқий ахборот маркази мамлакатдаги қонун ҳужжатлари маълумотлари миллий базасини юритиш, қонун ҳужжатларини миллий базада расмий нашр этиш, норматив-ҳуқуқий ҳужжатларни ва тегишли ахборот-таҳлилий материалларни Вазирлар Маҳкамаси томонидан белгиланадиган рўйхат бўйича барча давлат органлари ва ташкилотларга электрон шаклда етказиш билан шуғулланади.

Шунингдек, юридик ва жисмоний шахсларнинг қонун ҳужжатлари маълумотлари миллий базасидан белгиланган тартибда фойдаланиши, аутсорсинг шартларида юридик адабиётлар ва расмий нашрларнинг расман чоп этилишини таъминлаш ҳам марказ вазифасига киради.

Марказ базаси — Lex.uz’да ҳозирга қадар 75 913 та норматив-ҳуқуқий ва бошқа ҳужжатлар жойлаштирилган. Бугунги кунда бу базани бутун дунёда кузатиб бориш мумкин. Жумладан, АҚШ, Германия, Англия, Жанубий Корея, Беларусь, Россия, Украина каби давлатларда ҳам фойдаланувчилар бор. Биргина октябрь ойида сайтни дунёнинг 115 га яқин мамлакатидан қарийб 670 мингдан ортиқ фойдаланувчи кузатган. Сайтдаги қонун ҳужжатлари нафақат давлат тилида, балки, рус, инглиз ва қорақалпоқ тилларида ҳам эълон қилинмоқда.

Бугунгача «Адолат» нашр белгиси билан мамлакатда қонун ижодкорлиги ва ҳуқуқни қўллаш амалиётини ривожлантиришга ҳисса қўшиш мақсадида 900 га яқин номдаги қарийб 10 миллион нусха адабиёт нашр этилган. Шунингдек, жорий йилда 1519 та қабул қилинган қонун ҳужжати 142 та давлат органи ва ташкилотига ҳимояланган алоқа каналлари орқали етказиб берилди.

Марказда нашр этилган Ўзбекистон Республикаси кодекслари, қонунлари, юридик ва бошқа турдаги адабиётларни китобхонлар www.adolatmarkazi.uz интернет дўконидан сотиб олмоқда.

Тадбир иштирокчилари марказ томонидан нашр этилаётган китоблар нархини арзонлаштириш кераклигини айтди. Марказ мутахассислари бу ҳолатни ўрганиб чиқишни, кўзи ожизлар учун ҳам махсус китоблар чоп этилиши кўзда тутилаётганини маълум қилди.