Тошкентда 17—18 ноябрь кунлари байроқ маршлари бўлиб ўтади

Тошкент шаҳрида 17—18 ноябрь кунлари Ўзбекистон Республикаси давлат байроғи қабул қилинганлигининг 28 йиллиги муносабати билан ватанпарварлик руҳидаги маданий-кўнгилочар ва спорт тадбирлари ўтказилиши режалаштирилган. Бу ҳақда Тошкент шаҳар ҳокимлиги маълум қилди.

Хабар берилишича, ташкил этилаётган тадбирлар «Давлат байроғи — фахрим, ғурурим!» шиори остида ўтказилади.

17 ноябрь куни соат 11:00 дан 12:00 гача Амир Темур хиёбонидан Ислом Каримов кўчаси бўйлаб Халқлар дўстлиги майдонигача ҳарбий отлиқлар отрядининг Ўзбекистон давлат байроғи марши ўтказилади.

Худди шу вақтда Яшнобод туманидаги флагшток ўрнатилган майдондан Халқлар дўстлиги майдонигача велоспортчиларнинг Ўзбекистон давлат байроғи марши бўлиб ўтади.

Шу куни соат 15:00 дан 17:00 гача Ойбек ва Нукус кўчалари кесишмасидан «Humo Arena» муз саройигача «Давлат байроғи — фахрим, ғурурим!» оммавий югуриш марафони ўтказилади.

18 ноябрь куни соат 12:00 дан 16:00 гача Бектемир туманидаги баланд флагшток ўрнатилган айланма йўлда маданий-кўнгилочар ва спорт тадбирлари ўтказилади.

Шу куннинг ўзида соат 16:00 дан 17:00 гача Бектемир туманидаги флагшток ўрнатилган майдондан Халқлар дўстлиги майдонигача авто, мотоҳаваскорлар жамоаларининг Ўзбекистон давлат байроғи марши бўлиб ўтади.

Соат 16:00 дан 19:00 гача эса Яшнобод туманидаги баланд флагшток ўрнатилган хиёбонда байрам тадбири ташкил этилади.

Соат 16:00 дан 20:00 га қадар Халқлар дўстлиги майдонида асосий байрам тадбири бўлиб ўтади.