Марказий Осиё давлатлари раҳбарларининг иккинчи маслаҳатлашув учрашуви Тошкентда 29 ноябрь куни бўлиб ўтади. Бу ҳақда Ўзбекистон ташқи ишлар вазири Абдулазиз Комилов маълум қилди, деб ёзмоқда «РИА Новости».
15 ноябрь куни Тошкентда Қозоғистон, Қирғизистон, Тожикистон, Туркманистон ва Ўзбекистон ташқи ишлар вазирларининг учрашуви бўлиб ўтди. Вазирлар учрашувда Марказий Осиё давлатлари раҳбарларининг иккинчи маслаҳатлашув учрашувига тайёргарлик масаласини ҳам муҳокама қилди.
Ташқи ишлар вазирлари учрашувида Абдулазиз Комилов Марказий Осиё давлатлари раҳбарларининг иккинчи маслаҳатлашув учрашуви 29 ноябрь куни Тошкент шаҳрида бўлиб ўтишини таъкидлаган.
Ўзбекистон ташқи ишлар вазири томонидан маълум қилинишича, вазирлар кутилаётган саммитгача ҳужжатлар лойиҳаларини тайёрлаш ишларини якунлашни кўзламоқда.
Аввалроқ Қозоғистоннинг биринчи президенти Нурсултон Назарбоев мазкур учрашувнинг 27 ноябрь куни бўлиши мумкинлигини маълум қилган эди.
Марказий Осиё давлатлари раҳбарларининг биринчи маслаҳатлашув учрашуви 2018 йилда Қозоғистон пойтахтида бўлиб ўтган.
Изоҳ (0)