Комил Алламжонов Нафосат Оллошукурова ва Давлатназар Рўзметов билан боғлиқ воқеаларга муносабат билдирди

Ахборот ва оммавий коммуникациялар агентлиги раҳбари Комил Алламжонов Нафосат Оллошукурова ва Давлатназар Рўзметов билан боғлиқ воқеаларга муносабат билдирди.

Унинг таъкидлашича, «Нафосат Оллошукурова ҳамда Давлатназар Рўзметов билан боғлиқ ҳолатга нега жимсиз, нима учун муносабат билдирмаяпсиз, демак бу ерда бир гап бор», деган танқидий фикрлар кўп билдирилди. Айрим блогерлар воқеа ва ҳолатни аниқ билмасдан туриб, дарҳол «ана бошланди, танқид қилган журналистни энди шундай тақдир кутади», деган гапларни ҳам айтган.

«Мана, ўрганишлар ниҳоясига етиб, бугун агентлигимизга ушбу ҳолатга ойдинлик киритиши мумкин бўлган барча мутасадди раҳбарларни тўпладик. Ҳар бир келган масъул ўз йўналишида ҳолатга ойдинлик киритиб берди. Марҳум Давлатназар Рўзметовнинг автоҳалокати чизмаларда ва видеокамералардан олинган фотолар билан тушунтириб берилган бўлса, Оллашукурова масаласида унинг аниқ диагнози ва ҳолати ҳақида далилий фикрлар билдирилди», — деган Комил Алламжонов.

Марҳум журналистнинг оиласига, албатта, агентлик томонидан ёрдам кўрсатилишини айтиб, Оллашукуровага тезроқ соғайиб, оиласи бағрига қайтишини тилаган.

Шунингдек, барча журналист ва блогерларни бирор-бир масалани оммага кўтариб чиқаётганда, шошқолоқлик қилмасдан, ҳиссиётларга берилмасдан, жиддий суриштирув ва фактларга асосланиб, холис материал беришга чақирган.

«Агарда агентлик қайсидир воқеа юзасидан баёнот бермаган ёки сукут сақлаган бўлса, бу ушбу ҳолатни назардан четда қолдирди, дегани эмас. Соҳага тааллуқли барча ҳолатлар эътиборимизда ва уларнинг барчаси ўрганиб чиқилмоқда. Қонун доирасида фаолият кўрсатган барча журналист ва блогер бевосита агентликнинг ҳимоясида ва ҳамиша шундай бўлиб қолади», — дея қўшимча қилган у.

Эслатиб ўтамиз, хоразмлик журналист Давлатназар Рўзметов ЙТҲ оқибатида ҳалок бўлганди. Бош прокуратура ахборотига кўра, воқеа 6 ноябрь куни соат тахминан 23:55 да Урганч—Хива йўлининг 4-километрида юз берган. Фуқаро С.У. ўзи ишлаб келаётган корхонага тегишли «Газел»да журналистни уриб юборган. Давлатназар Рўзметов ўтган йили пахта теримига бағишланган ҳокимлик йиғилишини суратга олмоқчи бўлганида қўлга олиниб, етти суткага қамалган эди.