Axborot va ommaviy kommunikatsiyalar agentligi rahbari Komil Allamjonov Nafosat Olloshukurova va Davlatnazar Ro‘zmetov bilan bog‘liq voqealarga munosabat bildirdi.
Uning ta’kidlashicha, “Nafosat Olloshukurova hamda Davlatnazar Ro‘zmetov bilan bog‘liq holatga nega jimsiz, nima uchun munosabat bildirmayapsiz, demak bu yerda bir gap bor”, degan tanqidiy fikrlar ko‘p bildirildi. Ayrim blogerlar voqea va holatni aniq bilmasdan turib, darhol “ana boshlandi, tanqid qilgan jurnalistni endi shunday taqdir kutadi”, degan gaplarni ham aytgan.
“Mana, o‘rganishlar nihoyasiga yetib, bugun аgentligimizga ushbu holatga oydinlik kiritishi mumkin bo‘lgan barcha mutasaddi rahbarlarni to‘pladik. Har bir kelgan mas’ul o‘z yo‘nalishida holatga oydinlik kiritib berdi. Marhum Davlatnazar Ro‘zmetovning avtohalokati chizmalarda va videokameralardan olingan fotolar bilan tushuntirib berilgan bo‘lsa, Ollashukurova masalasida uning aniq diagnozi va holati haqida daliliy fikrlar bildirildi”, — degan Komil Allamjonov.
Marhum jurnalistning oilasiga, albatta, аgentlik tomonidan yordam ko‘rsatilishini aytib, Ollashukurovaga tezroq sog‘ayib, oilasi bag‘riga qaytishini tilagan.
Shuningdek, barcha jurnalist va blogerlarni biror-bir masalani ommaga ko‘tarib chiqayotganda, shoshqoloqlik qilmasdan, hissiyotlarga berilmasdan, jiddiy surishtiruv va faktlarga asoslanib, xolis material berishga chaqirgan.
“Agarda аgentlik qaysidir voqea yuzasidan bayonot bermagan yoki sukut saqlagan bo‘lsa, bu ushbu holatni nazardan chetda qoldirdi, degani emas. Sohaga taalluqli barcha holatlar e’tiborimizda va ularning barchasi o‘rganib chiqilmoqda. Qonun doirasida faoliyat ko‘rsatgan barcha jurnalist va bloger bevosita аgentlikning himoyasida va hamisha shunday bo‘lib qoladi”, — deya qo‘shimcha qilgan u.
Eslatib o‘tamiz, xorazmlik jurnalist Davlatnazar Ro‘zmetov YTH oqibatida halok bo‘lgandi. Bosh prokuratura axborotiga ko‘ra, voqea 6-noyabr kuni soat taxminan 23:55 da Urganch—Xiva yo‘lining 4-kilometrida yuz bergan. Fuqaro S.U. o‘zi ishlab kelayotgan korxonaga tegishli “Gazel”da jurnalistni urib yuborgan. Davlatnazar Ro‘zmetov o‘tgan yili paxta terimiga bag‘ishlangan hokimlik yig‘ilishini suratga olmoqchi bo‘lganida qo‘lga olinib, yetti sutkaga qamalgan edi.
Izoh (0)