Тошкент шаҳар ҳокимлиги: Пойтахтдаги электробуслар сони 10 та етказилади

Тошкент шаҳар ҳокими Жаҳонгир Ортиқхўжаев БМТ Тараққиёт дастурининг Ўзбекистондаги доимий вакили Матильда Димовскани қабул қилди. Бу ҳақда шаҳар ҳокимлиги матбуот хизмати хабар берди.

Учрашувда БМТ Тараққиёт дастурининг Ўзбекистондаги фаолияти ва Тошкент шаҳар ҳокимлиги билан ўзаро ҳамкорликда амалга оширадиган лойиҳалари борасида фикр алмашилди.

Тошкент шаҳар ҳокими БМТ Тараққиёт дастурининг ривожланиш соҳасидаги дастурларни ишлаб чиқиш ва амалга ошириш йўлида халқаро ташкилотлар билан ҳамкорликда олиб бораётган ишларини эътироф этиб ўтди. Хусусан, Ўзбекистон ва бевосита Тошкент билан ҳамкорликдаги лойиҳалар муҳим аҳамиятга эгалигини таъкидланган.

Матильда Димовска Ўзбекистонда барқарор тараққиётга эришиш ҳамда халқ фаровонлиги йўлида амалга оширилаётган ислоҳотларни юқори баҳолади. Тошкент ҳақида сўз юритар экан, пойтахтдаги яшиллик ва ободлик уни ниҳоятда таъсирлантирганини, кўчаларда қушларнинг сайраши эшитилишини, бундай ҳолатни аввал фаолият юритган шаҳарлари учратмаганлигини эътироф этган.

Ўзаро мулоқот давомида Тошкентда яшил транспорт йўлагини ташкил қилиш, электробуслар сонини ошириш ҳамда «Ақлли шаҳар» концепцияси доирасидаги ҳамкорликдаги лойиҳаларни ривожлантириш масаласи муҳокама этилди. Маълум қилинишича, ҳозирда Тошкентда синов тариқасида битта электробус ҳаракатланмоқда. Яқинда уларнинг сони ўнтага етказилади. Шунингдек, шаҳарда турли соҳалар фаолиятини ривожлантириш борасида қатор инновацион лойиҳалар амалга оширилмоқда. «Ақлли шаҳар» концепцияси ишлаб чиқилган ва уни ҳаётга жорий этиш чоралари кўрилмоқда.