Toshkent shahar hokimligi: Poytaxtdagi elektrobuslar soni 10 ta yetkaziladi

Toshkent shahar hokimi Jahongir Ortiqxo‘jayev BMT Taraqqiyot dasturining O‘zbekistondagi doimiy vakili Matilda Dimovskani qabul qildi. Bu haqda shahar hokimligi matbuot xizmati xabar berdi.

Uchrashuvda BMT Taraqqiyot dasturining O‘zbekistondagi faoliyati va Toshkent shahar hokimligi bilan o‘zaro hamkorlikda amalga oshiradigan loyihalari borasida fikr almashildi.

Toshkent shahar hokimi BMT Taraqqiyot dasturining rivojlanish sohasidagi dasturlarni ishlab chiqish va amalga oshirish yo‘lida xalqaro tashkilotlar bilan hamkorlikda olib borayotgan ishlarini e’tirof etib o‘tdi. Xususan, O‘zbekiston va bevosita Toshkent bilan hamkorlikdagi loyihalar muhim ahamiyatga egaligini ta’kidlangan.

Matilda Dimovska O‘zbekistonda barqaror taraqqiyotga erishish hamda xalq farovonligi yo‘lida amalga oshirilayotgan islohotlarni yuqori baholadi. Toshkent haqida so‘z yuritar ekan, poytaxtdagi yashillik va obodlik uni nihoyatda ta’sirlantirganini, ko‘chalarda qushlarning sayrashi eshitilishini, bunday holatni avval faoliyat yuritgan shaharlari uchratmaganligini e’tirof etgan.

O‘zaro muloqot davomida Toshkentda yashil transport yo‘lagini tashkil qilish, elektrobuslar sonini oshirish hamda “Aqlli shahar” konsepsiyasi doirasidagi hamkorlikdagi loyihalarni rivojlantirish masalasi muhokama etildi. Ma’lum qilinishicha, hozirda Toshkentda sinov tariqasida bitta elektrobus harakatlanmoqda. Yaqinda ularning soni o‘ntaga yetkaziladi. Shuningdek, shaharda turli sohalar faoliyatini rivojlantirish borasida qator innovatsion loyihalar amalga oshirilmoqda. “Aqlli shahar” konsepsiyasi ishlab chiqilgan va uni hayotga joriy etish choralari ko‘rilmoqda.