Давлат тест маркази ходимларининг маоши икки ярим бараварга ошиши кутилмоқда

Вазирлар Маҳкамаси ҳузуридаги Давлат тест маркази «Тест тизимини такомиллаштиришга қаратилган қўшимча чора-тадбирлар тўғрисида»ги қарор лойиҳасини муҳокамага қўйди.

Қарорга кўра, тестология ва педагогик ўлчовлар, чет тилидан малака ошириш курсларини ташкил этиш ҳамда соҳада етакчи халқаро ташкилотлар билан ҳамкорликни йўлга қўйиш, Марказий Осиёда тестология бўйича минтақавий илмий мактаб яратиш мақсадида ДТМ қошида «Илмий-ўқув амалий марказ» давлат унитар корхонаси ташкил этилади.

Қуйидагилар илмий-ўқув амалий марказининг асосий вазифалари этиб белгиланади:

• тест материалларини ишлаб чиқиш ва уларнинг сифатини аниқлаш, тестология ва педагогик ўлчовлар соҳасидаги илмий тадқиқот натижаларини нашр этиш;
• тест материалларини ишлаб чиқиш ва уларнинг сифатини аниқлаш бўйича мутахассислар – тестологларни тайёрлаш, шунингдек, бу борада маҳаллий ва халқаро олий таълим муассасалари билан ўзаро ҳамкорликни йўлга қўйиш;
• шартнома асосида қисқа ва узоқ муддатли тестология, педагогик ўлчовлар, чет тиллари бўйича тингловчиларнинг малакасини ошириш, диагностик тест синовларини ташкил этиш;
• тестология ва педагогик ўлчовлар соҳасида илмий изланиш олиб борувчи шахслар учун зарур шарт-шароитлар яратиш, хориж тажрибаларни ўрганиш асосида миллий тизимни яратишга таклифлар бериш;
• халқаро имтиҳон олувчи ташкилотлар билан ҳамкорликда имтиҳонларни ташкил этиш ва ўтказиш.

Илмий-ўқув амалий марказ фаолияти шартнома бўйича жисмоний ва юридик шахсларга хизматлар кўрсатишдан тушган маблағлар ҳисобига ҳамда зарурат бўлганда ДТМнинг ривожлантириш жамғармаси маблағлари ҳисобидан молиялаштирилади.

Республика ҳудудларида тест синовларини ўтказишга мўлжалланган катта сиғимли бино ва иншоотларни қуриш учун ДТМ ҳузурида «Ягона буюртмачи хизмати» инжиниринг компанияси ташкил этилади.

Инжиниринг компаниясининг асосий вазифалари этиб қуйидагилар белгиланди:

• тест синовлари ўтказилиши белгиланган катта сиғимли бино ва иншоотларнинг намунавий эскиз лойиҳасини белгиланган тартибда тайёрлаш;
• қурилиш-пудрат ташкилотини танлаш бўйича тендер (танлов) савдоларини ташкил этиш ва ўтказиш;
• қурилиш-монтаж ишларини назорат қилиш ва объектларни қабул қилиб олиш.

ДТМ Ўзбекистон Молия вазирлиги билан биргаликда бир ой муддатда илмий-ўқув амалий марказ ва инжиниринг компанияси ташкилий тузилмаларини тасдиқланади, ходимларнинг чекланган сони, меҳнатга ҳақ тўлаш жамғармаси белгиланади.

Бунда ДТМ директорига, зарур ҳолларда, тузилмаларга ходимларнинг белгиланган умумий чекланган сони доирасида ўзгартиришлар киритиш ҳуқуқи берилади.

Шунингдек, ДТМ ҳамда Ўзбекистон Республикаси Бандлик ва меҳнат муносабатлари вазирлигининг 2020 йил 1 январдан бошлаб ягона тариф сеткаси бўйича меҳнатга ҳақ тўлашнинг тасдиқланган разрядларига кўра, ДТМ бошқарув ходимлари лавозим маошларини аниқлашда тариф коэффициентларини икки ярим баравар миқдорида қўллаш ҳамда бу билан боғлиқ қўшимча харажатларни ДТМ ҳузуридаги ДТМ фаолиятини ривожлантириш жамғармаси маблағлари ҳисобидан қоплаш тўғрисидаги таклифига розилик берилади.