6 ноябрь куни Ўзбекистон Олий Мажлиси Қонунчилик палатасида ўтказилган «Ҳукумат соати»да мамлакатда ахборот технологиялари ва коммуникацияларини ривожлантириш борасида мавжуд муаммолар юзасидан депутатларнинг саволларига Ахборот технологиялари ва коммуникацияларини ривожлантириш вазири Шуҳрат Содиқов жавоб қайтарди.
Таъкидланишича, ахборот технологиялари ва коммуникациялари соҳасида ўтган 9 ой мобайнида жами 7,9 триллион сўмлик хизматлар кўрсатилган. Жумладан, дастурий маҳсулотлар ишлаб чиқарувчи корхоналар томонидан 546,6 миллиард сўмлик компьютер дастурлаш хизматлари кўрсатилган. Уларни экспорт қилиш ҳажми 102,5 миллион АҚШ долларни ташкил этган.
Инвестиция дастурига мувофиқ, жами 82,8 миллион АҚШ доллар маблағ ўзлаштирилиб, белгиланган режа 153 фоизга бажарилган.
Телекоммуникация тармоқларини янада ривожлантириш йўналишида оператор ва провайдерлар томонидан амалга оширилган кенг кўламли ишлар натижасида халқаро интернет тармоғига уланишнинг умумий ўтказувчанлик қобилияти 1 200 Гбит/с ни, фойдаланилаётган сиғими 650,0 Гбит/с ташкил этган бўлиб, йил бошига нисбатан 48,1 фоизга ўсган.
Шунингдек, ижтимоий инфратузилма объектларининг интернет хизматларидан фойдаланиш имконияти кўрсаткичлари (халқ таълими —31 фоиз, мактабгача таълим — 29 фоиз ва тиббиёт муассасалари —31 фоиз) мамлакатдаги барча ижтимоий инфратузилма объектларининг сонига олиб қараганда жуда паст бўлиб, мазкур кўрсаткичларни кескин ошириш учун зарур чора-тадбирларни ишлаб чиқиб, амалга ошириш юзасидан таклифлар берилди.
Жорий йил июль ойида Ирландиянинг Оокла компанияси Speedest Global Index ҳар ойлик рейтингини эълон қилганди. Унга кўра, Ўзбекистон симли интернет тезлиги бўйича рейтингда юқорилаган, мобил интернет бўйича — пастлаганди.
Изоҳ (0)