6-noyabr kuni O‘zbekiston Oliy Majlisi Qonunchilik palatasida o‘tkazilgan “Hukumat soati”da mamlakatda axborot texnologiyalari va kommunikatsiyalarini rivojlantirish borasida mavjud muammolar yuzasidan deputatlarning savollariga Axborot texnologiyalari va kommunikatsiyalarini rivojlantirish vaziri Shuhrat Sodiqov javob qaytardi.
Ta’kidlanishicha, axborot texnologiyalari va kommunikatsiyalari sohasida o‘tgan 9 oy mobaynida jami 7,9 trillion so‘mlik xizmatlar ko‘rsatilgan. Jumladan, dasturiy mahsulotlar ishlab chiqaruvchi korxonalar tomonidan 546,6 milliard so‘mlik kompyuter dasturlash xizmatlari ko‘rsatilgan. Ularni eksport qilish hajmi 102,5 million AQSh dollarni tashkil etgan.
Investitsiya dasturiga muvofiq, jami 82,8 million AQSh dollar mablag‘ o‘zlashtirilib, belgilangan reja 153 foizga bajarilgan.
Telekommunikatsiya tarmoqlarini yanada rivojlantirish yo‘nalishida operator va provayderlar tomonidan amalga oshirilgan keng ko‘lamli ishlar natijasida xalqaro internet tarmog‘iga ulanishning umumiy o‘tkazuvchanlik qobiliyati 1 200 Gbit/s ni, foydalanilayotgan sig‘imi 650,0 Gbit/s tashkil etgan bo‘lib, yil boshiga nisbatan 48,1 foizga o‘sgan.
Shuningdek, ijtimoiy infratuzilma obyektlarining internet xizmatlaridan foydalanish imkoniyati ko‘rsatkichlari (xalq ta’limi —31 foiz, maktabgacha ta’lim — 29 foiz va tibbiyot muassasalari —31 foiz) mamlakatdagi barcha ijtimoiy infratuzilma obyektlarining soniga olib qaraganda juda past bo‘lib, mazkur ko‘rsatkichlarni keskin oshirish uchun zarur chora-tadbirlarni ishlab chiqib, amalga oshirish yuzasidan takliflar berildi.
Joriy yil iyul oyida Irlandiyaning Ookla kompaniyasi Speedtest Global Index har oylik reytingini e’lon qilgandi. Unga ko‘ra, O‘zbekiston simli internet tezligi bo‘yicha reytingda yuqorilagan, mobil internet bo‘yicha — pastlagandi.
Izoh (0)