«Або Муслими соҳиби қирон ғайратларига чидай олмай, ғазабларидин ҳар бир мўйлари кийимларидин тешиб чиқиб кетгон, анинг камарбандидин ‘Ё Али’ деб азот кўтариб, муборак бошларидин етти маротаба айлантири-иб ҳавога отдилар. Ул малъуннинг нопок вужуди бир ош пишгунга қадар кўздин ғойиб бўлибдур».
«Шум бола» киносидан. «И»ларга урғу бериб ўқилсин.
Ижтимоий мавзуда ёзсам, одатда, муайян шахсларни назарда тутиб ва унинг ўзи ҳам блогпостни ўқишини ҳисобга олиб ёзаман. Аммо қуйидаги қаҳрамонларимиз бу блогпостни ўқимаслиги юз фоиз аниқ. Умидим шуки, сартарошхонага чиқиб навбатда ўтирганингизда буни смартфондан ўқиб берасиз.
Фото: «Дарё»
1-суҳбат
- Мустақиллик бўлганда бутун дунё Ўзбекистонга ҳужум қилиш учун армиясини тўплаб келаётганда йўлига Россия туриб олибди. Кейин улар қайтиб кетибди. Ислом Каримов бова қайтиш қилганда яна улар «босволамиз» деб танкка ўтириб келаётса, Путин «бўлди, қайтинглар, керакмас», деб уларни қайтарворган экан.
Изоҳ: Кўряпсизми, оддий одамларимизнинг сиёсий онгини. Рус пропагандаси уларнинг миясини қай даражада ювган, демайман, чунки ҳатто РосТВ ҳам бунақа парадоксал фикрлар узатмайди. Мустақилликка эришиш ҳақида 28 йил кўрсатсангиз ҳам эртакнамо гапларни кўтариб юришади.
2-суҳбат
- Америка президенти бизга «газингга юз доллардан бераман», деганда бизники ўйланиб турса, Путин шарт ўртани кесиб, «юз эллик» дебди. Бобо қўлни ташлабди. Америкалик «шошмай турганингда ошмоқчийдим» деган экан, Путин «бай бўлди, рус битта гапиради» дебди.
Изоҳ: Биз нечун севамиз Владимир Путинни? Эркин ахборотдан мосуво одамларимиз учун чўрткесар Путин – дунёни айёр Америка фитналаридан қутқарувчи якка-ю ягона қаҳрамон.
3-суҳбат
- Ғалати замонларга қолиб кетдик. Ўзбеклар Россияда, буёқда хитойлар ғишт пиширяпти, зовур қазияпти. Китобда ёзишича, бир кун улар дунёни эгаллаб, «Хитойингман – худойингман» деркан. Буёғи оз қолди. Фақат бизни эгаллаб олишидан олдин разведкасини юбораркан. «Қара-чи, ўзбеклар бир-биридан қуруқ чойни, тузни, нонни қизғанадими-йўқми?» деркан. Одамлар шу арзимаган нарсаларниям бир-биридан аяса, кейин «Ҳа, буларда иттифоқлик йўқолибди», деб шартта босволаркан.
Изоҳ: Асл сабаби иқтисод, геосиёсат ва аҳоли миграцияси билан изоҳланувчи жараён. Фақатгина бу билимлар одамларимизга етарли берилаётгани ҳақида индамадим. Соғлом билим йўқ жойда оломон турли мифларга ишона бошлайди. Агар биз ўз потенциалимизни ишга солсак, дунёни билимимиз билан эгаллаймиз, деб уларни ишонтиришга уриниб кўринг-чи.
4-суҳбат
Бунда жой манзили ҳикоячи қаерлик эканига қараб, Наманган, Марғилон, Андижон, Яккабоғ, Хоразм, Жиззах ёки бошқа жойга ўзгариб туради.
- Гарбачўп/Ислом Каримов ҳар куни эрталаб туриб «Қўқон тинчми?» деб сўраркан. Ёрдамчилари, «Ҳа, тинч» деса, «Худога шукр», деб овқатини егани ўтираркан.
Изоҳ: Ҳурматли юртдошлар, бу бизга қандай фахр беради? Биз марказга бўйсунмайдиган эрксевар халқмиз демоқчимизми? Тартибсизлигимиз билан ғурурланяпмизми?Бошқа ғурурланадиган жиҳатимиз йўқлигидан тасалли учун ўйлаб топганмизми?
Сарвар уста
Муаллиф фикри таҳририят нуқтаи назаридан фарқ қилиши мумкин.
