Жиззахда 27 сентябрь куни соат 15:00 ларда йўл четига ташлаб кетилган янги туғилган чақалоқ топилди. Бу ҳақда «Дарё»га Бош прокуратура матбуот хизмати маълум қилди.
Чақалоқ Зомин туманида яшовчи 2 нафар фуқаролар томонидан Шароф Рашидов тумани, «Ғазғонтепа» маҳалласи ҳудудидан ўтувчи йўлнинг 292 километрида «Жиззах—Зарбдор» йўналишида йўл четидан 4—5 метр узоқликда топилган.
Қайд этилишича, чақалоқ оқ рангли матога ўралган ҳолатда қора рангли полиэтилен пакет ичида ташлаб кетилган. Уни топиб олган шахслар Жиззах вилояти перенатал марказига олиб келган. Аммо кўрсатилган тиббий ёрдамларга қарамай, чақалоқ 29 сентябрда вафот этган.
Суд тиббий экспертизасининг хулосасига кўра, қиз жинсли чақалоқ чала, ҳаётга лаёқати жуда паст ҳолатда туғилган. Бола топилган вақтда туғилганига камида бир сутка бўлган, бир муддат парваришланган. Унинг танасида тан жароҳатлари топилмаган.
Ҳолат юзасидан Шароф Рашидов тумани прокуратураси томонидан Жиноят кодексининг 117-моддаси 2-қисми (Хавф остида қолдириш оқибатида одам ўлиши) билан жиноят иши қўзғатилган. Ушбу модда бўйича жиноят содир этган шахс 2 йилгача ахлоқ тузатиш ишлари ёки 2 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.
Изоҳ (0)