23 октябрь куни Ўзбекистон Президенти Шавкат Мирзиёев томонидан саноатни ривожлантириш, нефть-газ маҳсулотлари ишлаб чиқариш ва истеъмолчиларга мунтазам етказиб бериш борасидаги ишлар таҳлилига бағишланган йиғилиш бўлиб ўтган эди.
Ушбу йиғилишда давлат раҳбари томонидан углеводород хом ашёсини қазиб олиш ва қайта ишлаш ҳажмини ошириш, иқтисодиёт тармоқлари, аҳоли ва экспортга ёқилғини узлуксиз етказиб бериш, технологик сарф-харажат ва йўқотишларни камайтиришга алоҳида эътибор қаратиш зарурлиги таъкидланиб, зарурий топшириқлар берилган эди.
«Ўзбекнефтгаз» АЖ матбуот хизматининг хабар беришича, 28 октябрь куни жамиятнинг Қарши шаҳридаги биносида ушбу топшириқларни жойлардаги ижросини таъминлаш мақсадида Ўзбекистон Бош вазирининг маслаҳатчиси, Энергетика вазири Алишер Султонов томонидан йиғилиш ўтказилди.
Тизим раҳбарлари иштирокидаги йиғилишда нефть маҳсулотлари, табиий ва суюлтирилган газ ишлаб чиқариш ҳамда уларни иқтисодиёт тармоқлари ва аҳолига етказиб бериш прогноз кўрсаткичларининг бажарилиш ҳолати таҳлил этилди.
Йиғилиш якунига кўра, муҳокама қилинган масалалар юзасидан тегишли чора-тадбирлар белгиланди.
Унга кўра, режада белгиланган вазифаларни ижросини ўз вақтида таъминламагани учун Муборак нефть ва газ қазиб чиқариш бошқармаси бошлиғи Бекзод Нарзиев эгаллаб турган лавозимидан озод этилди. Ушбу лавозимга Углеводородларни қазиб чиқариш департаменти бошлиғи Р.Шеров тайинланди.
«Ўзбекнефтгаз» АЖ бошқарув раисининг қазиб чиқариш бўйича ўринбосари Алишер Мустафоев ҳамда Устюрт газ қазиб чиқариш бошқармаси бошлиғи О.Ўринбоев ишдаги камчиликлари сабаб қатъий огоҳлантириш олди.
«Ўзбекнефтгаз» АЖ Газли нефть ва газ қазиб чиқариш бошқармаси бошлиғи К.Амоновга ушбу лавозимга яқинда тайинланганлиги сабаб йил якунига қадар қазиб чиқариш кўрсаткичларини янада ошириш талаби қўйилди.
Изоҳ (0)