Бандлик ва меҳнат муносабатлари вазирлиги «Korean and migrations» хусусий бандлик агентлиги МЧЖга берилган Ўзбекистон фуқароларини хорижда ишга жойлаштириш фаолияти билан шуғулланишга рухсат этувчи 0010-сонли лицензия тўхтатилганини маълум қилди.
«Korean and migrations» хусусий бандлик агентлиги МЧЖ фуқароларни Кореяга ишга жойлаштириш юзасидан улар билан шартнома имзолаган. Бандлик ва меҳнат муносабатлари вазирлигига хусусий бандлик агентлиги фуқаролар олдидаги мажбуриятларини белгиланган муддатда бажармагани тўғрисида кўплаб норозилик мазмунидаги мурожаатлар келиб тушган.
Шу муносабат билан Бандлик ва меҳнат муносабатлари вазирлиги Вазирлар Маҳкамасининг 2018 йил 12 сентябрдаги 725-сонли қарори билан тасдиқланган «Ўзбекистон Республикасидан ташқарида иш излаётган шахсларни ишга жойлаштириш бўйича фаолиятни лицензиялаш тартиби тўғрисида»ги Низомининг 45-46-бандларига мувофиқ, «Korean and migrations» хусусий бандлик агентлиги МЧЖ лицензиясини тўхтатиш тўғрисида қарор қабул қилди.
Қайд этилишича, Ўзбекистон фуқароларининг Кореядаги вақтинчалик меҳнат фаолиятини йўлга қўйиш икки давлат Меҳнат вазирлиги томонидан имзоланган англашув меморандуми асосида амалга оширилади. Унга кўра, Е9 виза билан фуқароларни Кореяга ишга жойлаштириш ваколати фақат Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги зиммасига юклатилган. Кореяда ишга жойлаштириш хусусий бандлик агентликлари ваколатига кирмайди.
Мазкур хусусий бандлик агентлигидан жабр кўрганлар бўлса, ИИББга мурожаат қилиш сўралади, дейилади хабарда.
Мавзуга доир:
- Тошкентда 52 кишининг аризаси асосида Human хусусий бандлик агентлиги раҳбарига нисбатан жиноят иши қўзғатилди
- Корея орзусидаги юзлаб ўзбекистонликлар алданган. Уларнинг айримлари ўзини ўлдириш ва оиласидан ажрашиш даражасига етган
- Ўзбекистондаги 30 та хусусий бандлик агентлиги бирорта ҳам фуқарони хорижга жўнатмагани маълум бўлди
Изоҳ (0)