Эрдўғон Сурия шимоли-шарқини курд гуруҳларидан тозалашни ваъда берди

Туркия президенти Ражаб Тоййиб Эрдўғон агар «Халқ ўз-ўзини ҳимоя қилиш кучлари» курд жангари гуруҳлари Сурия шимоли-шарқидаги ҳудудни тарк этмаса, Анқара уларга қарши ҳарбий ҳаракатларни қайта бошлашини маълум қилди, деб ёзмоқда «ТАСС».

Чегара ҳудудимизда тарихий аҳамиятга эга ҳодисалар содир бўлмоқда. Биз қочоқлар учун хавфсизлик зонасини ташкил қилмоқчимиз. Россия билан мамлакат ҳудудида ичкарига қараб 30 километр кенгликдаги ва 340 километр узунликдаги ҳудудда қўшма патрул тадбирларини ўтказишни келишдик. Агар террорчилар ажратилган 150 соат вақт давомида ҳудудни тарк этмаса яна куч ишлатишни бошлаймиз.

Ражаб Тоййиб Эрдўғон, Туркия президенти 

Туркия президенти аввал АҚШ ҳам курдларнинг ушбу ҳудуддан чиқиб кетишини билдиргани, бироқ ушбу воқеа ҳанузгача содир бўлмаганлигини қайд этди.Шунингдек, Эрдўғон Европа ўз ваъдасида турмаса, суриялик қочоқлар учун чегараларни очиб юборишини айтиб таҳдид қилди.22 октябрда Россия ва Туркия президентлари Владимир Путин ҳамда Ражаб Тоййиб Эрдўғон Сочи шаҳрида Сурия шимоли-шарқида қўшма патрул тадбирлари ўтказиш, бу ердаги беқарор вазиятни яхшилаш бўйича ҳамкорлик қилиш ҳақидаги меморандумни имзолаган. Шундан сўнг Анқара «Тинчлик булоғи» ҳарбий операциясини яна 150 соатга тўхтатган.