Олий Мажлис Сенати раиси Танзила Норбоева Японияга ташрифи доирасида Япония ташқи ишлар вазирининг махсус ёрдамчиси Ичиро Кавабата билан учрашди. Бу ҳақда Сенат ахборот хизмати хабар берди.
Учрашувда парламент фаолияти такомиллаштирилиши, ижро этувчи ҳокимият органлари фаолияти устидан парламент назорати кучайиб бориши, қонун ижодкорлиги иши тобора яхшиланиб бораётгани ҳақида қисқача ахборот берилди.
Ичиро Кавабата таъкидлаганидек, Японияда Ўзбекистондаги кенг кўламли ва жадал ислоҳотлар диққат билан кузатилмоқда ва юқори баҳоланмоқда. Ўзбекистонда юз бераётган ўзгаришлар икки томонлама Ўзбекистон—Япония ҳамкорлигини янада фаоллаштириш учун янги кенг имкониятлар очиб беради.
Бунда икки мамлакат халқлари қадриятлари ва анъаналари, менталитети, турмуш тарзи ўхшашлиги, меҳнатсеварлиги ҳамда меҳмондўстлиги мамлакатларни яқинлаштирувчи муҳим омил ҳисобланади. Шу боис Ўзбекистон япониялик туристларни тобора кўпроқ жалб қилмоқда.
Шунингдек, Танзила Норбоева ташриф доирасида Япониянинг Ўзбекистондаги собиқ элчиси, «Дўстлик» ордени соҳиби Кёко Накаяма билан учрашди.
Учрашувда Япония ҳукумати ва тадбиркорлари Ўзбекистон Президенти раҳбарлигида олиб борилаётган кенг миқёсдаги ислоҳотларга юқори баҳо бериши таъкидланди.
Томонлар Ўзбекистон ва Япония ўртасида парламентлараро ҳамкорлик кенгайиб бораётганидан, жумладан икки мамлакат парламентлари аъзолари ўртасида ўзаро ташрифлар сони кўпайганлигидан мамнунлигини билдирди.Кёко Накаяма Ўзбекистон парламентидаги ўзгаришларга ижобий баҳо бериб, жорий йил декабрь ойида Олий Мажлис Қонунчилик палатасига бўлиб ўтадиган сайлов уюшқоқлик билан халқаро стандартларга тўлиқ мувофиқ равишда ўтишига ишонч билдирди.
Маданий-гуманитар ҳамкорликни янада мустаҳкамлаш юзасидан ҳам фикр алмашилди. Маданий хусусиятга эга лойиҳаларни биргаликда амалга ошириш, жумладан модалар, концертлар, кўргазмалар ташкил этиш имкониятлари муҳокама этилди. 2020 йилнинг биринчи ярим йиллигида қўшма тадбирлар ўтказиш масалаларини ишлаб чиқиш ҳақида келишувга эришилди.
Изоҳ (0)