Tanzila Norboyeva Yaponiyaga tashrifi doirasida ikki tomonlama aloqalarni rivojlantirish bo‘yicha uchrashuvlar o‘tkazdi

Oliy Majlis Senati raisi Tanzila Norboyeva Yaponiyaga tashrifi doirasida Yaponiya tashqi ishlar vazirining maxsus yordamchisi Ichiro Kavabata bilan uchrashdi. Bu haqda Senat axborot xizmati xabar berdi.

Uchrashuvda parlament faoliyati takomillashtirilishi, ijro etuvchi hokimiyat organlari faoliyati ustidan parlament nazorati kuchayib borishi, qonun ijodkorligi ishi tobora yaxshilanib borayotgani haqida qisqacha axborot berildi.

Ichiro Kavabata ta’kidlaganidek, Yaponiyada O‘zbekistondagi keng ko‘lamli va jadal islohotlar diqqat bilan kuzatilmoqda va yuqori baholanmoqda. O‘zbekistonda yuz berayotgan o‘zgarishlar ikki tomonlama O‘zbekiston—Yaponiya hamkorligini yanada faollashtirish uchun yangi keng imkoniyatlar ochib beradi.

Bunda ikki mamlakat xalqlari qadriyatlari va an’analari, mentaliteti, turmush tarzi o‘xshashligi, mehnatsevarligi hamda mehmondo‘stligi mamlakatlarni yaqinlashtiruvchi muhim omil hisoblanadi. Shu bois O‘zbekiston yaponiyalik turistlarni tobora ko‘proq jalb qilmoqda.

Shuningdek, Tanzila Norboyeva tashrif doirasida Yaponiyaning O‘zbekistondagi sobiq elchisi, “Do‘stlik” ordeni sohibi Kyoko Nakayama bilan uchrashdi.

Uchrashuvda Yaponiya hukumati va tadbirkorlari O‘zbekiston Prezidenti rahbarligida olib borilayotgan keng miqyosdagi islohotlarga yuqori baho berishi ta’kidlandi.

Kyoko Nakayama O‘zbekiston parlamentidagi o‘zgarishlarga ijobiy baho berib, joriy yil dekabr oyida Oliy Majlis Qonunchilik palatasiga bo‘lib o‘tadigan saylov uyushqoqlik bilan xalqaro standartlarga to‘liq muvofiq ravishda o‘tishiga ishonch bildirdi.

Madaniy-gumanitar hamkorlikni yanada mustahkamlash yuzasidan ham fikr almashildi. Madaniy xususiyatga ega loyihalarni birgalikda amalga oshirish, jumladan modalar, konsertlar, ko‘rgazmalar tashkil etish imkoniyatlari muhokama etildi. 2020-yilning birinchi yarim yilligida qo‘shma tadbirlar o‘tkazish masalalarini ishlab chiqish haqida kelishuvga erishildi.