Суд томонидан жазо ўтаётган маҳбус аёл 22 октябрь, сешанба куни Наманган вилояти ИИБ 6-сон тергов ҳибсхонасида вафот этди. Бу ҳақда Бош прокуратура матбуот котиби Ҳаёт Шамсутдинов маълум қилди.
22 октябрь куни соат тахминан 02:30 да Наманган вилояти ИИБ 6-сон тергов ҳибсхонасида сақланаётган маҳкум Ш.М. ўзи сақланаётган ҳибсхона камерасида тўсатдан саломатлиги ёмонлашиб, кўрсатилган тиббий муолажаларга қарамасдан вафот этган.
Қайд этилишича, маҳбус аёл суднинг ҳукмига кўра Жиноят кодексининг 168 ва бошқа моддалар билан узоқ муддатга озодликдан маҳрум этилган ва мазкур суд ҳукмидан норози бўлиб апелляция шикояти ёзган.
Суд-тиббий экспертизасининг дастлабки хулосасида маҳкум Ш.М.нинг ўлими юракнинг камқонлик касаллиги, ўткир юрак қон-томир етишмовчилиги натижасида келиб чиққанлиги, марҳумда тан жароҳатлари аниқланмаганлиги кўрсатилган.
Мазкур ҳолат юзасидан Наманган тумани прокуратураси томонидан терговга қадар текширув ҳаракатлари ўтказилмоқда.
Изоҳ (0)