Шавкат Мирзиёев 22 октябрь, сешанба куни Ўзбекистон Республикасининг «Валютани тартибга солиш тўғрисида»ги қонунининг янги таҳририни имзолади. Қонун Ўзбекистон Президентининг 2017 йил 2 сентябрдаги «Валюта сиёсатини эркинлаштиришга доир биринчи навбатдаги чора-тадбирлар тўғрисида»ги фармони ижросини таъминлаш мақсадида ишлаб чиқилган.
Марказий банк матбуот хизматининг изоҳлашича, аввалги таҳрирдан фарқли ўлароқ, янги таҳрирдаги қонун бир қатор меъёрлар ва механизмлар билан тўлдирилган бўлиб, унда валютани тартибга солиш ва валютани назорат қилишнинг асосий тамойиллари белгиланди.
Хусусан:
- валютани тартибга солиш ҳамда валютани назорат қилиш тизимининг ягоналиги;
- валютани тартибга солиш ва валютани назорат қилиш соҳасидаги давлат сиёсатини амалга оширишда иқтисодий чораларнинг устуворлиги;
- резидентлар ва норезидентларнинг валюта операцияларига давлат органларининг қонунга хилоф равишда аралашувига йўл қўйилмаслиги асосий тамойиллар сифатида белгилаб қўйилди.
Шу билан бирга:
- валюта операцияларини амалга оширишда резидентлар ва норезидентлар томонидан чет эл валютасидаги маблағларнинг эркин тасарруф этилиши;
- валюта операцияларини амалга ошириш билан боғлиқ бир қатор рухсат бериш тартиботларининг бекор қилиниши;
- ташқи савдо операциялари бўйича активларни Ўзбекистон Республикасига репатриация қилиш бўйича талаблар;
- резидент жисмоний шахслар томонидан хорижда чекловларсиз ҳисобварақлар очишга рухсат берилиши;
- жисмоний шахслар ўртасида носавдо валюта операциялари бўйича 100 миллион сўм эквивалентигача бўлган миқдордаги пул ўтказмалари амалга оширилиши мумкинлиги;
- жисмоний шахслар томонидан 100 миллион сўм эквивалентидан ошмаган миқдордаги нақд пул маблағларини Ўзбекистон Республикасидан эркин олиб чиқилиши назарда тутилмоқда.
Изоҳ (0)