17 октябрь, пайшанба куни Қашқадарё вилояти кўп тармоқли тиббиёт маркази нейрохирургия бўлимида ғузорлик Озод Норматовнинг бўйнидан игна олиб ташлангани ҳақида хабар берилган эди.
«Севимли» телеканалининг «Замон» ахборот дастурида бу операция акс этган лавҳа эфирга узатилди.
Йигитнинг отаси Рўзибой Норматовнинг сўзларига кўра, 16 октябрь куни ўғли Озодбекнинг аҳволи ёмонлашиб, қайт қилган. Шундан сўнг, Ғузор туман тиббиёт бирлашмасига мурожаат қилинган. Текширувлар натижасида йигитнинг игна ютиб юборганлиги аниқлангач, у республика шошилинч тиббий ёрдам илмий маркази Қашқадарё филиалига ётқизилган.
Қайта текширувлар игна тананинг хавфли жойида жойлашганини ва уни операция йўли билан олиб ташлаш мумкинлигини кўрсатган. Операция 45 дақиқа давом этган ва муваффақиятли якунланган.
Эслатиб ўтамиз, 2018 йилнинг январь ойида фарғоналик 11 ойлик боланинг танасида 15 игна топилган ва уларнинг 12 таси олиб ташланган эди. Игналар боланинг танасига ташқи томондан тиқилгани маълум бўлган ва бу ҳолат бўйича Фарғона вилояти прокуратураси томонидан жиноят иши очилган эди.
Изоҳ (0)