АҚШ вице президенти Майк Пенс курдлар Сурия чегара ҳудудини тарк этганини маълум қилди

АҚШ вице-президенти Майк Пенс курд кучлари Суриядаги хавфсизлик ҳудудидан ўз қўшинларини олиб чиқиб кетганлигини маълум қилди, деб ёзмоқда «Интерфакс».

«Суриядаги курдлар ҳарбий кучлари қўмондони қўшиннинг Туркия ҳарбийлари назоратидаги хавфсизлик ҳудудидан чиқиб кетганлигини билдирди. Мен қайтиб келаётган вақтимда АҚШ расмийлари икки томон билан ўт очишни бутунлай тўхтатиш юзасидан музокараларни давом эттирган», — дея таъкидлаган Пенс Вашингтондаги Heritage Foundation тадбиридаги нутқида.

«Президент Дональд Трампнинг кучли раҳбарлик салоҳияти натижасида урушни бутунлай тўхтатилишига ишонаман», — дейди Пенс.

Вице-президент курд жангариларига Америка билан иттифоқда ИШИД террорчиларига қарши курашгани учун миннатдорлик билдирган.

«Ҳарбийларимиз ва иттифоқдошларимиз (курдлар) ИШИДга қарши курашда ўз мақсадига эришганидан кейин президент Трамп Америка халқига берган ваъдасида туради. АҚШ қўшинлари мамлакатга қайтарилади», — деган вице-президент.

Анқара 9 октябрда Сурия шимоли-шарқида «Тинчлик булоғи» ҳарбий операциясини бошлаган. Ҳарбий ҳаракатлардан кўзланган мақсад «Сурия демократик кучлари», Курдистон ишчи партияси курд жангарилари ҳамда ИШИД террорчиларини чегара ҳудудидан қувиб чиқариш ва у ерда Туркиядаги қочоқлар учун «хавфсиз зона» ташкил қилишдан иборат эди.17 октябрда Туркия ва АҚШ расмийлари Анқарада Суриядаги «Тинчлик булоғи» операциясини курдлар чегара ҳудудидан чиқиб кетиши учун 120 соатга тўхатишни келишиб олганди. Бунда курдларнинг ҳудудни тарк этиши бўйича масъулиятни Вашингтон зиммасига юклатилганди.22 октябрь куни Россия президенти Владимир Путин ҳамда Туркия давлат раҳбари Ражаб Тоййиб Эрдўғон Сочида Суриядаги вазиятни муҳокама қилган ва қочоқлар учун «хавфсиз зона» ташкил қилишда қўшма патрул тадбирларини амалга оширишни келишиб олган ва бу ҳақда меморандум имзолаган.ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.