Туркия ҳукумати Америка санкцияларига жавоб қайтариш ҳақида бош қотирмоқда. Бу ҳақда «Известия» нашри хабар берди.
Депутат Ўзтурк Йилмаз Анқаранинг навбатдаги қадами «Инчирлик» ҳарбий базасидаги америкаликлар сонини қисқартиришни тавсия қилди. «Инчирлик» ҳарбий базаси Туркия ва Сурия чегарасидан 130 километр узоқликда жойлашган ҳамда Яқин Шарқ ҳудудида АҚШ ядро қуроли сиғадиган ягона объект ҳисобланади.
Депутатнинг айтишича, ушбу чеклов Вашингтоннинг санкцияларга муносиб жавоб бўлади. Икки давлат ўртасидаги муносабатларнинг узилишига ҳам таъсир кўрсатмайди.
АҚШ 15 октябрда Туркияга қарши санкциялар қўлланилганини эълон қилган. Чеклов чоралари туркларнинг энергетика, мудофаа вазирликлари ва бир нечта юқори лавозимдаги раҳбарларга қарши қўлланилган. Шунингдек, Вашингтон турк пўлати учун йиғимларни 50 фоизга оширмоқчи, кейинчалик молия ҳамда визалар берилиши борасида ҳам тақиқлар амалга оширилиши мумкин.
Туркия президенти Ражаб Тоййиб Эрдўғон 9 октябрда Сурия шимоли-шарқида «Тинчлик булоғи» операциясининг бошланганини эълон қилган. Анқаранинг ушбу ҳарбий ҳаракатлари Курдистон ишчи партияси жангарилари ҳамда ИШИД террорчиларига қарши қаратилган.
Изоҳ (0)