АҚШ сентябрь охирида Саудия Арабистони нефть заводларига уюштирилган ҳужумга жавобан Эронга қарши махфий кибероперация ўтказган. Бу ҳақда Reuters агентлиги АҚШ ҳукуматидаги манбаларига таяниб хабар тарқатган.
Киберҳужумлар серияси Эрон сиёсатининг бошқа хориж давлатлардаги тарғиботига қарши қаратилган. Пентагон ушбу ҳужумлар амалга оширилганлиги юзасидан расмий ахборот беришни истамаган.
«Сиёсат ҳамда оператив хавфсизлик нуқтаи назаридан кибермакондаги операциялар, разведка ва режалаштирилган тадбирларни ОАВда муҳокама қилмаймиз», — дея таъкидлаган АҚШ мудофаа вазирлигининг расмий вакили Эллиса Смит.
Ўз навбатида Эрон Ахборот ва коммуникация технологиялари вазири Муҳаммад Жавод Азари Жаҳромий сентябрда Вашингтон томонидан Теҳронга нисбатан киберҳужумлар уюштирилганини инкор қилган.
«Йўқ, буни улар тушларида амалга оширишган», — дея кибероперациялар ҳақидаги хабарларга изоҳ берган Жаҳромий.
14 сентябрда Saudi Aramco миллий нефть компаниясига тегишли икки заводга дронлар ҳужуми уюштирилган, портлашлар бўйича масъулиятни Ямандаги хусий-жангарилар ўз зиммасига олганди. Дронлар ҳужуми натижасида юзага келган ёнғиндан сўнг дунёдаги энг катта нефть экспортёрининг суткасига 9,8 миллион баррел нефтни қайта ишлаш қуввати 5,7 миллион баррелга тушиб кетган.
АҚШ ҳамда Саудия Арабистони ушбу ҳужумлар ортида Эрон турганлигини билдирган. Америка ҳамда Саудия ҳукумати вакилларининг сўзларига кўра, ҳужум дронлар ва ракеталар ёрдамида амалга оширилган, хусий-жангарилари ихтиёрида бу кабу замонавий қуроллар бўлмаган. Теҳрон ушбу айбловлар асоссиз эканлигини қайд этган.
Изоҳ (0)