Олмалиқ шаҳридаги бир қатор мустақил блогерлар томонидан йўлкира нархи оширилиши юзасидан танқидий материал эълон қилинди. Унда вилоят ҳокимининг 729-сонли қарори талаблари тўла бажарилмагани, хусусан, ҳокимлик веб сайтида, маҳаллий нашрларда қарор матни чоп этилмагани ҳақида сўз боради. Бу ҳақда Тошкент вилояти ҳокимлиги ахборот хизмати хабар бермоқда.
Мазкур вазият зудлик билан вилоят ҳокимининг матбуот котиби, вилоят ҳокимлиги ижро аппарати бош мутахассиси, мутахассислари ва мазкур қарор лойиҳасини тайёрлаган котибият иштирокида муҳокама қилинди.
Маълум бўлишича, қарор нусхасини ўрнатилган тартибда тарқатиш рўйхатига вилоят ҳокимлиги ахборот хизмати техник хато туфайли киритилмай қолган. Келгусида бундай ҳолат қайтарилмаслиги юзасидан тегишли масъуллар қатъий огоҳлантирилди.
Таъкидланишича, мазкур қарор лойиҳаси, амалдаги қонунчиликка мувофиқ, ҳукумат порталига 30 август куни муҳокама учун жойлаштирилган. Лойиҳа жойлаштирилган пайтдан бошлаб фуқаролар қарорнинг муҳокамаси жараёнида ўз фикр-мулоҳазаларини билдириши мумкин эди.
Қарор бугун, айни дақиқаларда вилоят ҳокимлигининг расмий веб сайтига жойлаштирилмоқда.
«Қарорнинг янги тарифларни жорий этилиши ва транспорт ташиш билан шуғулланувчи корхоналарнинг ушбу нархда хизмат кўрсатишига доир қисми ижросини таъминлаш вилоят транспорт бошқармаси ҳамда шаҳар, туман ҳокимликлари зиммасига юклатилган. Шу боис, Олмалиқ шаҳрида йўловчиларга транспорт хизмати кўрсатиш нархининг айнан 15 октябрь кунидан бошлаб оширилгани шаҳар ҳокимлигининг ички иши, деб ҳисоблаймиз.
Мустақил блогерларга мазкур ҳолатда фаол фуқаролик позициясини намоён этгани, воқеликка асосли муносабат билдиргани учун миннатдорлик билдирамиз», — дейилади хабарда.
Изоҳ (0)