2017 йилда Испаниядан ажралиб чиқиш тўғрисида референдум уюштирган Каталония сиёсатчилари қамоқ жазосига ҳукм қилинди. Каталониянинг собиқ президенти Ориоль Хункерас 13 йилга қамалди, деб хабар беради Bloomberg.
Минтақадаги ҳукуматда юқори лавозимларни эгаллаган саккиз киши тўққиз йилдан ўн икки йилгача бўлган муддатга озодликдан маҳрум этилди.
Каталониянинг ўша пайтдаги етакчиси, жараённи бошлаган Карлос Пучдемон эса Бельгиянинг Брюссель шаҳрида қувғинда қолмоқда.
Каталония пойтахти Барселонада сиёсатчилар устидан суд жараёни туфайли норозилик намойишлари бошланди.
Қайд этилишича, полиция шаҳарнинг бош вокзалида ўтириб намойиш ўтказаётган оломонни тарқатиб юборган.
Каталония мустақиллиги тўғрисидаги референдум 2017 йил 1 октябрь куни ўтказилган эди. Ўшанда овоз берувчиларнинг 90 фоизи минтақанинг Испания таркибидан ажралиб чиқишини ёқлаган эди. Шундан сўнг Пучдемон Каталония мустақиллиги ҳақидаги декларацияни имзолаган ва барча дунё мамлакатларини Каталонияни суверен давлат деб тан олишга чақирган эди.
Марказий ҳукумат референдум ўтказилишига қаршилик кўрсатишга уринган, жумладан, кучишлатар тизимларни ишга солган эди. Қаршилик чоғида 893 киши жабрланган эди.
Мадрид референдум натижаларини тан олмаган эди.
Изоҳ (0)