Қидирувдаги Isuzu Олтиариқдаги хонадонлардан биридан топилди. Бу ҳақда «Дарё»га Мажбурий ижро бюроси матбуот хизмати хабар берди.
Мажбурий ижро бюроси Учкўприк туман бўлими Тошкент туманлараро иқтисодий суди қарори билан қарздор «Восточние фрукти Фергани » МЧЖдан «Эхокартон» хусусий корхона фойдасига 154 700 000 сўм қарз ундириши керак бўлган. Ҳужжатларда қарздор корхона кўрсатилган манзилда давлат ижрочиси ҳеч нарса аниқлай олмаган. Шунингдек, жамият ушбу манзилда фаолият кўрсатмаганлиги маълум бўлган.
Ваколатли идораларга юборилган сўровномаларга Фарғона вилояти ИИБ ЙҲХБ ТРИБ томонидан қарздор МЧЖнинг Isuzu русумли транспорт воситаси борлиги ҳақида маълумот тақдим этилганидан сўнг зудлик билан мазкур транспорт воситасига нисбатан қидирув эълон қилинган.
Шу йилнинг 25 мартда бошланган қидирув 6 ой давом этиб, 30 сентябрда Олтиариқ туманида яшовчи фуқаро С.Э. уйига яшириб қўйилгани аниқланиб, жарима майдонига олиб кетилган.
«Қарздорнинг Isuzu’си қонунда белгиланган тартибда онлайн аукцион орқали сотувга қўйилиб, тушган маблағлар ундирувчига ўтказилади», — дейилади хабарда.
Изоҳ (0)