Халқ таълими вазирлигига қарашли «Маърифат» газетасининг онлайн нашри Фарғонада 29 сентябрь куни рўй берган йўл-транспорт ҳодисасида ҳалок бўлган мактаб директорлари ўринбосарлари ҳокимлик топшириғини бажариш учун кетаётган бўлганини маълум қилди.
29 сентябрь, якшанба куни соат 20:45 ларда Данғара туманидаги 25-мактаб директори ўринбосари М.Д. бошқариб кетаётган Nexia машинаси йўлни ёритувчи темир столбага урилиши натижасида автомашинага ўрнатилган газ балонида ёнғин содир бўлган. Ҳайдовчи ва олд ўриндиқда бўлган йўловчи — 26-сонли мактаб директори ўринбосари У.Ш.лар воқеа жойида ҳалок бўлган. Орқа ўриндиқда бўлган йўловчилар — 38-сонли мактаб директори ўринбосари Т.Л. ва Данғара тумани Халқ таълими бўлими қоровули М.Б. тан жароҳати олиб, шифохонага жойлаштирилганди.
Ижтимоий тармоқларда чиққан дастлабки хабарларда мактаб раҳбарлари Фарғона вилояти ҳокимлигида соқол ва рўмол масаласида ўтказилган видеоселектор йиғилишида иштирок этиш учун кетаётганида ЙТҲ содир бўлгани айтилганди. Бироқ Фарғона вилояти ҳокимлиги ахборот хизмати 30 сентябрга ўтар кечаси вилоят ҳокимлигида ҳеч қандай селектор йиғилиши ўтмаганлигини, бошқа бирон-бир сабаблар билан ҳам ҳеч ким, жумладан, Данғара туманида автоҳалокатга учраган шахслар вилоят ҳокимлигига чақирилмаганини билдирди.
Ички ишлар вазирлиги ҳам ўз навбатида 29 сентябрь куни Фарғона вилояти ҳокимлигида ҳеч қандай йиғилиш ёки селектор ўтказилиши белгиланмаганлиги, шунингдек, ЙТҲга учраган ҳайдовчи ва йўловчилар ўзларининг шахсий юмушлари билан Данғара туманидан Қўқон шаҳрига кетаётган бўлгани аниқланганини маълум қилган.
Мавзуга доир:
Данғара туман халқ таълими бўлими бошлиғи Алимардон Содиқов директор ўринбосарлари ва ХТБ қоровули Фарғона шаҳрида бўлиб ўтадиган тадбирга кўргазмали қуролларни олиб кетаётиб ҳалокатга учрагани ҳақиқат эканлигини тасдиқлаган.
«Ижтимоий тармоқларда тарқалган хабарларда мактаб раҳбарлари тунги селекторга кетаётгани ҳақида айтилибди. Мактаб директор ўринбосарлари, хўжалик бўйича масъул ва қоровул селекторларга чақирилмайди. Улар байрамга тайёргарлик учун кетишаётган эди», — дея изоҳ берган мутасадди «Kun.uz»га.
«Маърифат» газетасининг онлайн нашридаги материалда Данғара тумани ХТБ мудири Алимардон Содиқов мактаб директорлари ўринбосарлари туман ҳокимлигидан тушган топшириқ бўйича кетаётган бўлганини маълум қилган.
Халқ таълими вазирлигининг Назорат-ҳуқуқий хизмати «Фарғона ҳокими тунги селекторга чақиртирган мактаб раҳбарлари аварияда ҳалок бўлди» сарлавҳаси остида тарқалган мақоладан сўнг воқеа тафсилотларини ўрганиш мақсадида Данғара туманига борган. У ерда туман халқ таълими бўлими мудири Алимардон Содиқов билан суҳбат ўтказилган.
ХТБ мудири ходимлари автоҳалокатга учраганини 29 сентябрь куни 21:30 ларда эшитиб, зудлик билан воқеа жойига етиб борган. У вафот этган 25 ва 26-мактабларнинг директорлари ўринбосарларини кўмиш билан боғлиқ барча тадбирларда иштирок этганини айтган. Данғара туман ХТБ мудири Алимардон Содиқовнинг сўзларига кўра, ходимларнинг Фарғона шаҳрига боришлари юзасидан топшириқ берган туман ҳокимлиги мутасаддилари воқеа жойига келмаган, вафот этган ҳамда жароҳат олганларнинг ҳолидан хабар олмаган.
«Маърифат» газетасидаги мақолада мактаб директорлари ўринбосарларига айнан қайси мутасадди томонидан топшириқ берилгани очиқланмаган.
Изоҳ (0)