Qidiruvdagi Isuzu Oltiariqdagi xonadonlardan biridan topildi. Bu haqda “Daryo”ga Majburiy ijro byurosi matbuot xizmati xabar berdi.
Majburiy ijro byurosi Uchko‘prik tuman bo‘limi Toshkent tumanlararo iqtisodiy sudi qarori bilan qarzdor “Vostochniye frukti Fergani ” MChJdan “Exokarton” xususiy korxona foydasiga 154 700 000 so‘m qarz undirishi kerak bo‘lgan. Hujjatlarda qarzdor korxona ko‘rsatilgan manzilda davlat ijrochisi hech narsa aniqlay olmagan. Shuningdek, jamiyat ushbu manzilda faoliyat ko‘rsatmaganligi ma’lum bo‘lgan.
Vakolatli idoralarga yuborilgan so‘rovnomalarga Farg‘ona viloyati IIB YHXB TRIB tomonidan qarzdor MChJning Isuzu rusumli transport vositasi borligi haqida ma’lumot taqdim etilganidan so‘ng zudlik bilan mazkur transport vositasiga nisbatan qidiruv e’lon qilingan.
Shu yilning 25-martda boshlangan qidiruv 6 oy davom etib, 30-sentabrda Oltiariq tumanida yashovchi fuqaro S.E. uyiga yashirib qo‘yilgani aniqlanib, jarima maydoniga olib ketilgan.
“Qarzdorning Isuzu’si qonunda belgilangan tartibda onlayn auksion orqali sotuvga qo‘yilib, tushgan mablag‘lar undiruvchiga o‘tkaziladi”, — deyiladi xabarda.
Izoh (0)