Ахборот ва оммавий коммуникациялар агентлигида Президент Шавкат Мирзиёевнинг 10—11 октябрь кунлари Ашхабодда бўлиб ўтган МДҲ давлат раҳбарлари кенгаши йиғилишидаги иштирокига бағишланган брифинг бўлиб ўтди. Бу ҳақда агентлик матбуот хизмати маълум қилди.
Журналистларнинг саволларига Президент ҳузуридаги Стратегик ва минтақалараро тадқиқотлар институти директор ўринбосари Санжар Валиев ва институтнинг бошқа масъул ходимлари жавоб берди.
ОАВ вакилларида келгуси йили Ўзбекистон МДҲда раислик қилиши кўпроқ қизиқиш уйғотди.
Санжар Валиевнинг таъкидлашича, Ўзбекистон томонидан мазкур жараёнга катта тайёргарлик кўрилган. Жумладан, МДҲда раислик билан боғлиқ концепция ишлаб чиқилган ва Ашхабоддаги саммитда тақдим этилган. Унда асосий урғу берилиши кўзда тутилаётган ва ҳамкорларга таклиф этилаётган йўналишлар, келгуси йили амалга оширилиши режалаштирилган 60 дан ортиқ тадбир ўз аксини топган.
— МДҲдаги раислигимизга Улуғ Ватан урушидаги ғалабанинг 75 йиллиги санаси тўғри келади. Бунга бағишлаб кенг кўламли ҳарбий-мемориал тадбирлар ўтказилади, уларга МДҲ ёшлари фаол жалб этилади. Хавфсизликни таъминлаш мақсадида ҳуқуқ-тартибот идоралари, чегара тизимлари ҳамкорлигига эътибор қаратилади. Биз МДҲ мудофаа вазирлари кенгашидаги иштирокимизни тикладик, ҳаво ҳужумидан ҳимоя бирлашган тизимига қўшилдик. Энг асосийси, раислигимиз давомида МДҲни 2030 йилгача ривожлантириш концепцияси охирига етказилиши режалаштирилган. Ушбу ҳужжат икки йилдан бери ишлаб чиқилмоқда ва стратегик аҳамиятга эга, — деди Санжар Валиев.
Тадбирда ҳамкорликнинг муҳим йўналишлари сифатида парламентлараро алоқаларнинг кучайтирилиши ва минтақаларо тўғридан тўғри алоқаларнинг ўрнатилиши қайд этилди. Ўзбекистонда МДҲ минтақалари форуми ўтказилиши кўзда тутилаётгани билдирилди.
Изоҳ (0)