Тошкент шаҳрининг бош режаси 2020 йилда жамоатчиликка тақдим этилиши кутилмоқда. Бу ҳақда Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари Даврон Ҳидоятов Сенатнинг 23-ялпи мажлисида маълум қилди, дея хабар бермоқда «Дарё» мухбири.
Сенатор Зайниддин Низомхўжаев қонунчиликка мувофиқ, Ўзбекистонда шаҳарларнинг бош режалари ҳар беш йилда тасдиқланиши лозимлигини эслатиб, Тошкент шаҳрида бундай режа ҳали ҳам йўқлиги, оқибатда аҳоли қаерда уй-жойлар бузилиши ва дарахтлар кесилишидан бехабар қолаётгани, бу эса жамоатчиликнинг норозиликларига сабаб бўлаётганини таъкидлади.
Сенаторнинг саволига жавоб бераркан, Даврон Ҳидоятов ҳақиқатан ҳам 2013 йилда Тошкент шаҳрининг бош режаси ишлаб чиқилгани, бироқ тасдиқланмаганини тан олди. Айни вақтда, Туркия компанияси томонидан бош режа лойиҳаси тайёрланаётгани ва уни 2020 йилда тақдим этиш кутилаётганини маълум қилди.
Тошкент шаҳрининг бош режаси 2013 йилда ишлаб чиқилган, лекин у вақтда, ҳақиқатан ҳам, тасдиқланмаган. Ўтган йили уни кўриб чиққанимизда, бу бош режа ҳозирги кун талабларига тўғри келмаслиги ойдинлашди. Шу сабабдан биз 2019 йилнинг ўзида Туркия компаниясини жалб қилган ҳолда шаҳар бош режаси концепциясини ишлаб чиқдик, тасдиқладик ва раҳбарга кўрсатдик.Маълумот учун, Президент Шавкат Мирзиёев 2018 йил августидаги фармони билан пойтахт ҳокимлигига 2019 йил 1 январга қадар Тошкентнинг бош режаси концепциясини тасдиқлаш тўғрисидаги Президент қарори лойиҳасини тақдим этиш, шунингдек, 2019 йил 1 декабргача тасдиқланган бош режа концепцияси асосида пойтахтнинг янги бош режасини тасдиқлаш тўғрисидаги Президент қарори лойиҳасини Вазирлар Маҳкамасига киритиши тўғрисида топшириқ берган эди.Ҳозирги кунда бош режа бўйича иш олиб бориляпти ва, ўзингизга маълумки, бош режани тайёрлаш бир кунда бажариладиган иш эмас. Баъзи шаҳарлар, масалан, Россиядаги Қозон, Москва шаҳарлари вакиллари билан мулоқотимизда бош режани тайёрлаш беш йилдан саккиз йилгача ҳам вақт олгани айтилди. Бунда нафақат экология, балки барча масалаларни кўриб чиқиш керак.
Ҳозир бош режа бўйича иш олиб бориляпти. Келаётган 2020 йилда, режа бўйича, бош режани қабул қилиб оламиз. Ўйлайманки, биз кейинги йилларда бош режани жамоатчиликка ва раҳбаримизга тақдим этамиз.
Даврон Ҳидоятов, Тошкент шаҳар ҳокими биринчи ўринбосари
Февралда бош режа концепцияси апрель ойи охиригача тайёр бўлиши, лойиҳа устида Хитой, Туркия, Буюк Британия компаниялари иш олиб бораётгани айтилди (аслида концепцияни тасдиқлаш тўғрисидаги қарор лойиҳаси 2019 йил 1 январгача Президентга киритилиши лозим эди). Бунинг учун Тошкент 3D-камералар ўрнатилган вертолётлар воситасида, бош вазир Абдулла Арипов ва пойтахт ҳокими Жаҳонгир Ортиқхўжаев иштирокида «сканердан ўтказилиши» айтилди. Апрель ойига келиб бош режа концепцияси тақдимоти 20 майгача кечиктирилгани маълум бўлди.
Июнь ойида эса қурилиш вазири ўринбосари Шуҳратхўжа Ҳошимов журналистларнинг Тошкент шаҳар бош режаси концепцияси нима учун кечикаётгани ҳақидаги саволга жавоб бера туриб, бу шаҳар ҳокимлигининг муаммоси эканини айтган, шунга қарамай: «Концепция яқин бир ярим—икки ой ичида тайёр бўлади», деб таъкидлаган эди. Бу орада Британиянинг Беной архитектура компанияси Чирчиқнинг нариги соҳилида қуриладиган Янги Тошкентнинг мастер-плани лойиҳасини тақдим этган эди (кейинроқ ҳокимлик бу ҳали тасдиқланмаган лойиҳа эканлигини билдирган эди).
Тошкент шаҳар ҳокими Жаҳонгир Ортиқхўжаев май ойида блогер Кирилл Алтманъга берган интервьюсида бош режа масаласида шошилмаслик кераклигини айтган эди. Июнь ойи охирида бўлиб ўтган матбуот анжуманларининг бирида эса ҳоким стратегияни белгилашда ҳар доим ҳам бош режа лозим, деб ўйламаслигини таъкидлаган эди. «Ҳозир, кўпчилик, бош режа бўлса, ҳаётимиз осонлашиб қолади, деган тушунчада юрибди. Аммо, бош режа иқтисодий-сиёсий ёхуд бошқа соҳаларда ривожланишларни белгилаб беради, дегани эмас», — деганди ҳоким Ортиқхўжаев.
Изоҳ (0)